SİYASƏT
Əfqan Salmanov Ukraynanın ən yaxşı aqrar əməkçiləri sırasındadır
Kiyev, 14 mart (AZƏRTAC). AZƏRTAC-ın xəbər verdiyi kimi, martın 23-də Kiyevdəki “Ukrayna” Milli İncəsənət Sarayında bu ölkədə əsas nüfuzlu müsabiqə – “İlin adamı” müsabiqəsinin qaliblərini təltifetmə mərasimi olacaqdır. Mərasimə bütün ölkələrdə tamaşa etmək mümkün olacaqdır. “İlin aqrar işçisi” nominasiyasında bu fəxri adı almaq üçün iddiaçılar arasında həmvətənimiz zərdablı Əfqan Fəqan oğlu Salmanov da vardır. O, artıq 25 ildir ki, Ukraynada yaşayıb işləyir.
Əfqan Salmanov yaşadığı Sumı vilayətində şəkər çuğunduru sahəsinin dirçəldilməsinə görə bu nüfuzlu müsabiqəyə qatılmışdır.
Martın 13-də “İlin adamı” ümummilli reytinqinin Ali Akademik Şurası və Baş Müdriyyəti Kiyevdə təntənəli iclas keçirmişlər. İclasda bütün nominantlara, o cümlədən Əfqan Salmanova laureat diplomu təqdim edilmişdir.
Xatırladırıq ki, Ukrayna torpağında öz əməyinə, xeyriyyəçiliyinə və Ukraynanın bu şimal regionunda insanların rifahı naminə səmərəli fəaliyyətinə görə həmvətənimiz böyük hörmət qazanmışdır: o, iki dəfə Sumı vilayət sovetinin deputatı seçilmişdir, “Sumı Xatını”nın – Novaya Sloboda kəndinin fəxri vətəndaşıdır, vilayətin ən məşhur insanları arasında keçirilən “Sumı vilayətinin inciləri” regional reytinqinin qalibidir.
Zeynal Ağazadə
AZƏRTAC-ın xüsusi müxbiri
Kiyev