Hidayət Hüseynov: Heydər Əliyev hər zaman yaddaşlarda qalacaq
Tbilisi, 13 aprel, AZƏRTAC
Ulu Öndər Heydər Əliyev dünyanın tarixi şəxsiyyətləri, siyasətçiləri arasında özünəməxsus dəst-xətti olan liderdir. Heydər Əliyev dünya azərbaycanlılarının Ümummilli Lideridir. Biz hamımız şərəf və qürur hissi ilə deyirik ki, Heydər Əliyev hər zaman yaddaşlarda qalacaq.
Bu sözləri AZƏRTAC-a müsahibəsində Gürcüstan parlamentinin sabiq deputatı Hidayət Hüseynov söyləyib.
H.Hüseynov Ulu Öndər Heydər Əliyevlə ilk dəfə Gürcüstan parlamentinin deputatı kimi, 1996-cı il yanvarın 5-də Bakıda görüşüb. Deputat həmkarları görüşdə birinci onun danışmağını məsləhət görüblər: “Çox həyəcanlı idim. Belə bir tarixi şəxsiyyətin, dünyamiqyaslı siyasətçinin qarşısında çıxış etmək çox böyük məsuliyyət tələb edirdi. Mən Gürcüstan Prezidenti Eduard Şevardnadzenin salamlarını çatdırdım və bəzi məsələlər barədə danışdım. Danışmaqda çətinlik çəkdiyimi hiss edən Heydər Əliyev özünəməxsus şəkildə sözümü kəsdi və dedi ki, sən yaxşı danışırsan. Gürcüstan azərbaycanlıları Azərbaycan dilində bəzi nazirlərdən yaxşı danışırlar. O, bu sözləri, zarafatı ilə mənə ruh verdi”.
Heydər Əliyevin Azərbaycan dövlətinin memarı və qurucusu olduğunu söyləyən H.Hüseynov qeyd edib ki, məhz onun siyasi və zəngin dövlətçilik bacarığı nəticəsində Azərbaycan parçalanmaqdan xilas oldu. Ulu Öndərin 1990-cı il yanvarın 21-də Moskvadakı qətiyyətli addımı, cəsarətli çıxışı, 1993-cü ilin gərgin dövrlərində Gəncəyə getməsi, qardaş qırğınının qarşısını alması tarixi əhəmiyyətli hadisələrdir.
Gürcüstan parlamentinin sabiq deputatı deyir ki, Heydər Əliyevin qətiyyətli addımları, eyni zamanda, Gürcüstan ilə münasibətlərə də öz müsbət təsirini göstərdi. Ulu Öndərin 1996-cı ildə Tbilisidə soydaşlarımızla görüşü də mühüm tarixi əhəmiyyət kəsb edir. Onun azərbaycanlıları diaspor deyil, yerli aborigen xalq adlandırması sıradan replika deyildi. Ulu Öndər bununla çoxlarına ciddi siqnal və sifariş verdi. Bildirdi ki, burada yaşayan azərbaycanlılar tək deyillər, onların arxasında Azərbaycan dövləti dayanıb. O, bu sözləri ilə Gürcüstanda yaşayan azərbaycanlılarla bağlı tarixə möhür vurdu. Gürcüstanda yaşayan azərbaycanlılar bunu unutmayacaqlar və Heydər Əliyev dühası bu gün də bizim üçün şərəfdir.
“Belə bir deyim var: Diri var ki, tez bükəsən ağlara, ölü var ki, dayaq olur sağlara”. Bu gün Heydər Əliyev cismən aramızda olmasa da, onun adı, müqəddəs ruhu bizə dayaqdır. Biz onu heç zaman unutmadıq və unutmayacağıq”, - deyə sabiq deputat vurğulayıb.
H.Hüseynov Azərbaycanın bugünkü sürətli inkişafını da xüsusi qeyd edib: “Biz çox sevinirik ki, Ulu Öndərin siyasi kursunun layiqli davamçısı var. Ulu Öndərimizin Prezident İlham Əliyev kimi lider yetişdirməsi də tarixdə nadir hadisələrdəndir. Biz çox sevinirik və şükür edirik ki, Azərbaycanımızın belə praqmatik, uzaqgörən, bacarıqlı Prezidenti var. Otuz ilə yaxın bir müddətdə işğal altında olan torpaqlarımızın 44 günlük müharibə nəticəsində azad edilməsi, müharibə dövründə İlham Əliyevin xarici KİV-lərə müsahibələri, digər ölkələrin dövlət və hökumət başçılarına verdiyi cavablar onu bizim qürur mənbəyimizə çevirdi. Biz xoşbəxtik ki, Ulu Öndər kimi Ümummilli Liderimiz, onun layiqli davamçısı Prezident İlham Əliyev kimi rəhbərimiz var”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
