“Hilton Baku” mehmanxanasının əməkdaşları Azərbaycan Turizm İnstitutunda olmuşlar
Bakı, 14 may (AZƏRTAC). “Hilton Baku” mehmanxanasının əməkdaşları Azərbaycan Turizm İnstitutunda (ATİ) olmuşlar.
ATİ-dən AZƏRTAC-a bildirmişlər ki, bu ali təhsil ocağının tələbələri ilə görüşdə mehmanxananın treninq meneceri Gülnar Quliyeva çalışdığı otellər şəbəkəsinin əsasının 94 il əvvəl ABŞ-da Konrad Hilton tərəfindən qoyulduğunu, bəzi illərdə hətta müflisləşdiyini diqqətə çatdırmışdır.
“Dünyanı qonaqpərvərlik işığı və istisi ilə sevindirək” devizinə daim sadiq qaldıqlarını xüsusi vurğulayan G.Quliyeva, “Hilton Worldwide” şirkətinin dünya üzrə 3 min 900 otelində insanların rahatlığı üçün 630 min otağın yerləşdiyini söyləmişdir. O, demişdir ki, qonaqpərvərlik biznesində təkcə otellər şəbəkəsindəki otaqların sayı deyil, başlıcası yüksək xidmət mədəniyyəti sayəsində mənfəət, nüfuz qazanmaq olar. “Hilton Baku” komanda şəklində fəaliyyətə önəm verir. Elə bu səbəbdən mehmanxananın nüfuzu gündən-günə artır.
ATİ-nin tələbələri əsasən karyeranı necə qurmaq olar, mehmanxanada çalışmaq üçün başlıca şərt nədir, komanda deyilən heyətdə bizləri görmək istərdinizmi, otellərdə vəzifə bölgüsü necə aparılır və s. sualları cavablandıran mehmanxananın insan resursları üzrə əlaqələndiricisi Rəşad Hüseynzadə gələcək ixtisaslı turizm işçiləri ilə görüşdən məmnun qaldığını bildirmişdir.
Bölmənin digər xəbərləri
