SİYASƏT
İjevskdə əfsanəvi sahə müvəkkili Tofiq Kərimov vəfat etmişdir
Moskva, 19 yanvar (AZƏRTAC). AZƏRTAC Rusiya KİV-lərinə istinadən xəbər verir ki, Udmurtiya Respublikasının paytaxtı İjevsk şəhərində istefada olan milis podpolkovniki Tofiq Kərimov uzun sürən xəstəlikdən sonra 62 yaşında vəfat etmişdir. O, 1951-ci il iyulun 19-da Azərbaycanın Cəlilabad rayonunda anadan olmuşdur. Sovet ordusunda xidmətini başa çatdırdıqdan sonra Udmurtiyanın Daxili İşlər Nazirliyində işə qəbul olunmuşdur.
Tofiq Kərimov Udmurtiyanı özünə ikinci vətən hesab edirdi. O, rusiyalıları yaxından tanımış, Azərbaycan mədəniyyətini unutmadan Rusiya mədəniyyətinə qovuşmuşdu. Ömrünün 36 ilini həsr etdiyi xidmət dövründə udmurt dilinə də yiyələnmişdi.
O, 34 il İjevsk şəhərinin Ustinov Rayon Daxili İşlər Şöbəsində sahə milis müvəkkili işləmişdir. 2010-cu ildə böyük sahə milis müvəkkili vəzifəsindən istirahətə buraxılmışdır. Xidmət etdiyi dövr ərzində Tofiq Kərimov Trud küçəsində ictimai asayişi qorumuşdur. 6-cı mikrorayon sakinlərinin bir neçə nəsli onun gözləri qarşısında böyümüş və bir-birini əvəz etmişdir. Onların çoxu İjevskdə rus təbirilə Anatoli Fyodroviç adlandırdıqları T.Kərimovla şəxsən görüşməyi özünə şərəf sayırdı.
O, heç vaxt iş yerini dəyişməmiş və Udmurtiyada podpolkovnik rütbəsində yeganə böyük sahə müvəkkili olmuşdur. Onun fəxri adları, fərmanları və mükafatları vardır. 1989-cu ildə Tofiq Kərimova “Sovet İttifaqının əməkdar sahə inspektoru” adı verilmiş və o, II dərəcəli “Vətən qarşısında xidmətlərinə görə” medalı ilə təltif edilmişdir.
İjevskli Aniskininin povest və hekayələrindən bilik əxz etmiş və peşəni sevməyi öyrənmiş İjevsk sahə müvəkkillərinin bir neçə nəsli ondan nümunə götürmüşdür. Udmurtiyanın əməkdar jurnalisti, Rusiya Yazıçılar İttifaqının üzvü Tofiq Kərimovun konkret cinayət işləri əsasında yazdığı, həmçinin lirik və psixoloji təsirə malik təqribən 20 kitabı vardır. Tofiq Kərimov həyatda da, öz kitablarında da insanları bir-birinə qarşı diqqətli, nəzakətli və xeyirxah olmağa çağırırdı.
Fəridə Abdullayeva
AZƏRTAC-ın xüsusi müxbiri
Moskva