İordaniya Universitetinin azərbaycanlı tələbəsi Ayla Cəfərova Azərbaycan mövzusunda təqdimat keçirmişdir
Əmman, 14 may (AZƏRTAC). İordaniya Dövlət Universitetinin tələbə və müəllim heyəti bu ali məktəbin yeganə azərbaycanlı tələbəsi, Biznesin idarə edilməsi fakültəsinin birinci kursunda təhsil alan Ayla Cəfərovanın sayəsində ölkəmizlə tanış olmuşlar. Ayla ölkəmiz haqqında təqdimat mərasimi keçirmiş, onun iqtisadi uğurları, zəngin mədəniyyəti, qədim və maraqlı adət-ənənələri barədə məlumat vermişdir.
Bu universitetdə yaranmış ənənəyə görə, hər bir tələbə sessiya zamanı özünün seçdiyi bu və ya digər mövzu üzrə təqdimat keçirir. A.Cəfərova Xəzər dənizinin sahilində yerləşən ölkəmizin coğrafi mövqeyi, zəngin karbohidrogen ehtiyatları və bioloji resursları barədə, həmçinin son illərdə xarici siyasət sahəsində, sosial-iqtisadi sferalarda qazanılmış uğurlar haqqında söhbət açmışdır. O, qeyd etmişdir ki, bu gün Prezident İlham Əliyevin rəhbərlik etdiyi Azərbaycan müasir, demokratik, dünyəvi dövlətdir. Tələbə həmyerlimiz demişdir: “Bu gün Azərbaycan - dünya birliyində layiqli yer tutan və haqlı olaraq dünyanın təhlükəsiz və sabit ölkələrindən biri hesab edilən, aydın perspektivli, dinamik inkişaf edən, nüfuzlu müasir dövlətdir. Şərq ilə Qərb arasında yerləşən Azərbaycan son dərəcə tolerant ölkədir. Müasir azərbaycanlıların əcdadlarının çoxəsrlik mədəniyyəti, tarixi, adət və ənənələri müxtəlif sivilizasiya və mədəniyyətlərə xas olan elementləri özündə harmonik şəkildə birləşdirir”.
Ayla öz məruzəsində son illərdə Azərbaycanın sosial-iqtisadi inkişaf sahəsində qazandığı sanballı nailiyyətlərə, habelə yaxın illər üçün ölkənin qarşısında duran hədəflərə diqqəti cəlb etmişdir. Onun sözlərinə görə, Azərbaycan rəhbərliyinin əsas strateji məqsədi həm bütün göstəricilər üzrə ölkəni qabaqcıl mövqelərə çıxarmaq, həm də “Azərbaycan-2020” konsepsiyasında müəyyən edilmiş davamlı sosial siyasətin həyata keçirilməsi vasitəsilə insan kapitalını inkişaf etdirməkdir.
A.Cəfərovanın sözlərinə görə, vətəndaşların mənafeyi dövlət siyasətinin mərkəzindədir. Dövlət büdcəsinin sosial yönümlü olması, həmçinin təhsil, səhiyyə, mədəniyyət, incəsənət, turizm və başqa sahələrdə məqsədyönlü şəkildə həyata keçirilən səmərəli islahatlar ölkədə insan kapitalının inkişafında, həyat səviyyəsinin yüksəldilməsində, yoxsulluğun azaldılmasında mühüm rol oynayır.
Tələbə həmyerlimiz qeyd etmişdir ki, ölkəmizdə müasir sosial infrastruktur yaratmaq məqsədilə Azərbaycan dövləti tərəfindən külli məbləğdə vəsait səfərbər edilməsi nəticəsində həyatın bütün sahələrində çox böyük işlər görülmüşdür. Son 10 ildə Azərbaycanda 3000-dən çox məktəb, 500-ə yaxın xəstəxana, 35 olimpiya kompleksi tikilmiş və bərpa edilmiş, xeyli mənzil və başqa müasir obyektlər tikilmiş, çoxsaylı tarixi abidələr bərpa olunmuş, bir sıra başqa mühüm tədbirlər həyata keçirilmişdir. Onun sözlərinə görə, sosial siyasət sahəsində dövlət regionların inkişafına xüsusi diqqət yetirir. Hər biri beş illik dövrü əhatə edən iki proqramın uğurla həyata keçirilməsi sayəsində regionlar xeyli abadlaşmış, müasir infrastruktur obyektləri yaradılmış, regionlarla paytaxt arasında fərqlər nəzərəçarpacaq dərəcədə azalmışdır.
Ayla Cəfərova dinləyicilərin diqqətini daha bir fakta cəlb etmişdir ki, Azərbaycan rəhbərliyi tərəfindən əhali üçün əlverişli sosial şərait yaradılması, bütün ölkə miqyasında istehsalın artması, yeni iş yerlərinin açılması, əhalinin məşğulluğunun təmin edilməsi üzrə həyata keçirilən tədbirlər Azərbaycan vətəndaşlarının gəlirlərinin davamlı və sabit artması, həyatın keyfiyyətinin yaxşılaşması üçün etibarlı zəmin olmuşdur.
Gənc həmvətənimiz dövlət xərcləri sistemində sosial siyasətin rolunun və əhəmiyyətinin artmasını əyani şəkildə nümayiş etdirən statistik məlumatlara istinad etmişdir. “2014-cü ildə əhalinin sosial müdafiəsi və sosial təminat sahəsinə büdcə xərcləri 2013-cü ilin müvafiq göstəriciləri ilə müqayisədə 14 faiz, elm üçün xərclər 12,5 faiz, səhiyyə xərcləri 8,4 faiz, təhsil xərcləri 8 faiz artmışdır” - deyən A.Cəfərova vurğulamışdır ki, Azərbaycanın bu sahədə uğurlarını bütün nüfuzlu beynəlxalq təşkilatlar da etiraf edirlər. Davos Dünya İqtisadi Forumunun məlumatına görə, Azərbaycan insan kapitalı indeksinə görə Cənubi Qafqaz ölkələri arasında birinci, dünyanın 122 dövləti arasında 64-cü yeri tutur.
Azərbaycanlı tələbə bir fakta xüsusi diqqət yetirmişdir ki, son illərdə hətta dünyanın inkişaf etmiş ölkələrini də cənginə almış maliyyə böhranı iqtisadi sabitliyin pozulmasına və işsizliyin artmasına gətirib çıxardığı halda, Azərbaycanda 900 mini daimi əsasda olmaqla 1,2 milyon iş yeri açılmış, işsizlik səviyyəsi azaldılaraq 5 faizə düşmüşdür. Bu, Azərbaycanda sosial problemlərin həlli və insan kapitalına sərmayə qoyulması yolunda ən mühüm nailiyyətdir.
Ayla Cəfərova çıxışının sonunda qeyd etmişdir ki, bütün bu nailiyyətlər və uğurlar müasir Azərbaycanın memarı və qurucusu, ümummilli lider Heydər Əliyevin titanik səyləri sayəsində mümkün olmuşdur. Heydər Əliyev Azərbaycanın müstəqilliyinin bərpa olunmasında və müasir demokratik dövlət quruculuğunda müstəsna rol oynamışdır.
Azərbaycan Prezidenti İlham Əliyev Ulu Öndərin müəyyən etdiyi siyasi kursu bu gün uğurla davam etdirir, müəyyən mənada unikal olan ölkəmizin nailiyyətlərini daha da artırır.
Asya Hacızadə
AZƏRTAC-ın xüsusi müxbiri
Əmman
Bölmənin digər xəbərləri
