İSPANİYADAKI SOYDAŞLARIMIZ DÜNYA AZƏRBAYCANLILARININ HƏMRƏYLİYİ GÜNÜNÜ QEYD ETMİŞLƏR

29.12.2006 [18:05]
Çap et
A⁺ A^-

Azərbaycanın İspaniya Krallığındakı səfirliyindən AZƏRTAC-a bildirmişlər ki, dekabrın 27-də səfirlikdə Dünya Azərbaycanlılarının Həmrəyliyi günü münasibətilə tədbir keçirilmişdir.

Azərbaycan və türk icması nümayəndələrinin, İspaniyanın elm və mədəniyyət xadimlərinin iştirak etdiyi tədbirdə səfir Məmməd Əliyev Azərbaycan Prezidenti İlham Əliyevin bayram münasibətilə təbriklərini çatdırmış, ümummili liderimiz Heydər Əliyevin təşəbbüsü ilə 31 dekabrın Dünya Azərbaycanlılarının Həmrəyliyi günü kimi qeyd olunmasının soydaşlarımızın birliyinə, milli ruhun möhkəmlənməsinə səbəb olduğunu demişdir.

Azərbaycan və türk diaspor təşkilatlarının rəhbərləri dövlətimizin başçısı İlham Əliyevin xaricdə yaşayan azərbaycanlılara göstərdiyi diqqət və qayğıdan söz açmışlar.

Tədbirdə Azərbaycan süfrəsi açılmış və milli musiqimiz səsləndirilmişdir.