İsveç dilində Azərbaycanın turizm imkanlarını təbliğ edən sayt istifadəyə verilmişdir
Stokholm, 19 dekabr (AZƏRTAC). İsveçdə Azərbaycanın turizm imkanlarını təbliğ edən www.bakufan.com saytı istifadəyə verilmişdir.
AZƏRTAC xəbər verir ki, Azərbaycan-İsveç Federasiyasının maliyyə dəstəyi ilə hazırlanan sayt iki dildə - İsveç və ingilis dillərində fəaliyyət göstərir. Saytın yaradıcısı Babək Azadın sözlərinə görə, indiyədək İsveç dilində Azərbaycan, onun turizm imkanları haqqında saytın olmaması belə bir layihənin həyata keçirilməsinə əsas vermişdir.
Babək Azad demişdir: “Bu sayt vasitəsilə biz İsveç ictimaiyyətini Azərbaycan haqqında məlumatlandırır, onun turizm sahəsində özünəməxsus cəhətlərini nümayiş etdiririk. Saytda biz Azərbaycan Respublikası Mədəniyyət və Turizm Nazirliyinin portalında yerləşdirilmiş materiallardan geniş istifadə etmişik”.
Səhifədə Azərbaycan haqqında ümumi məlumat, xəbərlər, ölkəyə gəlmək üçün viza almaq qaydaları, həmçinin Azərbaycanda reallaşdırılan böyük layihələr haqqında informasiya yerləşdirilir. B.Azad qeyd etmişdir ki, Azərbaycanın fərqli turizm imkanları vardır və isveçlilərlə bunlarla tanış etməyə ehtiyac duyulurdu. “Düşünürük ki, yeni sayt vasitəsilə biz bu sahədə İsveçdə irəliləyiş əldə edəcəyik”, - deyə o bildirmişdir.
Bölmənin digər xəbərləri
