İsveç pəncərələri Ukraynada ikinci həyat qazanır
Stokholm, 8 oktyabr, Nərgiz Cəfərli, AZƏRTAC
İsveçdə tikinti materiallarından təkrar istifadə hərəkatı geniş vüsət alır. “Demontera” şirkəti yeni xidmət işləyib hazırlayıb ki, onun vasitəsilə istifadə olunmuş pəncərələr, qapılar və İsveç standartlarına uyğun gəlməyən digər materiallar Ukraynada dağıdılmış mənzillərin bərpası üçün göndərilir.
AZƏRTAC xəbər verir ki, layihənin başlanmasından indiyədək Xarkova iki böyük tədarük həyata keçirilib – ümumilikdə təqribən 2200 pəncərə və 100 qapı “NCC” və “Fabege” şirkətləri tərəfindən təqdim edilib. Materiallar humanitar yardım kimi təsnif edilir, ona görə də Avropa İttifaqı nəqliyyat xərclərini qarşılayır.
“Food for Kharkiv” təşkilat yerli tərəfdaşdır, alınan materialları quraşdırmağa kömək edir. Layihə meneceri Klas Esterberqin sözlərinə görə, pəncərələr tez quraşdırılıb və yerli sakinlər tərəfindən böyük minnətdarlıqla qarşılanıb.
Layihəyə maraq artır və qarşıdakı aylarda faner panelləri və digər tələb olunan komponentlər də daxil olmaqla, Malmödən yeni partiyaların tədarükü planlaşdırılır. Gələcəkdə santexnika, işıqlandırma və mətbəx dəstləri də Ukraynaya göndəriləcək.
“Demontera”nın baş direktoru Tomas Edselius qeyd edir ki, iqtisadi şəraitin yaxşılaşdırılması sayəsində şirkət bu il dövriyyəsini iki dəfə artırmağı gözləyir.
“Demontera”da hazırda 35 nəfər işləyir, şirkət tikinti materiallarının təkrar emalı və təkrar istifadəsi ilə məşğul olan üç mərkəzi idarə edir.
Bölmənin digər xəbərləri
