İsveçdə Respublika Gününə həsr olunmuş tədbir keçirilmişdir
Bakı, 27 may (AZƏRTAC). İsveç Azərbaycanlıları Konqresinin nümayəndələri Azərbaycan Xalq Cümhuriyyətinin yaradılmasının 96-cı ildönümü ilə əlaqədar İsveçin aparıcı iri siyasi partiyalarının nümayəndələri, bu ölkənin parlamentinin üzvləri, habelə İsveç hökumətinin və Xarici İşlər Nazirliyinin nümayəndələri ilə bir sıra görüşlər keçirmişlər.
Konqresdən AZƏRTAC-a bildirmişlər ki, görüşlər zamanı Azərbaycan Xalq Cümhuriyyəti haqqında materiallar, kitab və sənədlər təqdim edilmişdir. Xüsusi vurğulanmışdır ki, 28 May təkcə Azərbaycan üçün deyil, həm də bütün türk dünyası üçün tarixi hadisədir. Axı, Azərbaycan Cümhuriyyəti Şərqdə və müsəlman dünyasında ilk respublika olmuşdur.
Bildirilmişdir ki, o illərdə beynəlxalq konfranslarda iştirak etmiş Azərbaycan Xalq Cümhuriyyətinin nümayəndələri avropalıları ilk dəfə ölkəmizin tarixi ilə tanış etmişlər. İsveç Azərbaycanlıları Konqresinin üzvləri vurğulamışlar ki, artıq o zaman Bakı bütün regionun mədəni və siyasi həyatında böyük rol oynamışdır.
Bölmənin digər xəbərləri
