SİYASƏT
İSVEÇRƏDƏKİ AZƏRBAYCAN DİLİ VƏ MƏDƏNİYYƏTİ MƏKTƏBİNİN İKİNCİ TƏDRİS İLİ BAŞLANMIŞDIR
İsveçrənin Bern şəhərindəki Azərbaycan dili və Mədəniyyəti Məktəbinin (ADMM) ikinci tədris ili başlanmışdır.
Xarici Ölkələrdə Yaşayan Azərbaycanlılarla İş üzrə Dövlət Komitəsindən AZƏRTAC-a bildirmişlər ki, Azərbaycanlıların Mədəniyyət Mərkəzinin bu mühüm layihəsini İsveçrə Maarif Nazirliyi hərtərəfli dəstəkləyir. Bu il Bern şəhər rəhbərliyi məktəbə üç böyük sinif otağı ayırmış və bunlar təhsil üçün lazım olan hər cür avadanlıqla təchiz edilmişdir.
Məktəbdə yaş qrupuna görə iki sinif fəaliyyət göstərir. Bu siniflərdə günün birinci yarısında - Azərbaycan dili, ölkəmizin tarixi, musiqisi, bu günü haqqında bilik veriləcək, ikinci yarısında isə Azərbaycan milli rəqsləri tədris olunacaqdır. İsveçrənin digər bölgələrindən övladlarını həftəsonu məktəbə gətirən valideynlərin istirahəti üçün otaq da nəzərdə tutulmuşdur.
Xarici Ölkələrdə Yaşayan Azərbaycanlılarla İş üzrə Dövlət Komitəsi məktəbi bu il də dərsliklər və digər zəruri vəsaitlə təmin etmişdir.
######