Krımın Azərbaycanlılar İcmasının üzvləri türk əsgərlərinin memorialını ziyarət etmişlər
Bakı, 13 may (AZƏRTAC). Krımın Azərbaycanlılar İcmasının üzvləri türk əsgərlərinin xatirəsinə Sevastopolda ucaldılmış abidəni ziyarət etmişlər.
Bu barədə AZƏRTAC-a Krımın Azərbaycanlılar İcmasının rəhbəri Rəhim Hümbətov məlumat vermişdir.
Sevastopoldakı monument Krım müharibəsi dövründə (1853-1856-cı illər) həlak olmuş Osmanlı İmperiyası əsgərlərinin xatirəsinə ehtiram əlaməti kimi ucaldılmışdır. Krımda yaşayan azərbaycanlılar abidənin önünə tər-çiçəklər qoymuş, həlak olanların ruhuna dualar oxumuşlar.
Rəhim Hümbətov demişdir: “Türkiyə buradan uzaq olsa da, biz - azərbaycanlılar buradayıq. Biz həlak olmuş türk qardaşlarımızın şərəfinə ucaldılmış bu abidəni müntəzəm ziyarət edəcəyik, abidə önünə tər-çiçəklər qoyulması mərasimi ənənəyə çevriləcəkdir”.
Xatırladaq ki, Sevastopol şəhərində bu memorialın ucaldılması Türkiyənin vəsaiti hesabına həyata keçirilmişdir. Memoriala asfalt yol çəkilmiş, ətraf ərazi abadlaşdırılmışdır.
Bölmənin digər xəbərləri
