SİYASƏT
“LATIN AMERİKASI AZƏRBAYCANLILARI ASSOSİASİYASI” FƏALİYYƏTƏ BAŞLAMIŞDIR
Diaspor ilə İş üzrə Dövlət Komitəsinin mətbuat xidmətindən AZƏRTAC-a bildirmişlər ki, Meksika ştatının Mexiko şəhərində “Latın Amerikası Azərbaycanlıları Assosiasiyası” yerli icra orqanlarında rəsmi qeydiyyatdan keçərək fəaliyyətə başlamışdır.
Assosiasiyanın əsas məqsədi Latın Amerikası ölkələrində yaşayan soydaşlarımızı bir araya gətirmək, Azərbaycan Respublikasını və azərbaycançılıq ideologiyasını yüksək səviyyədə təmsil etməkdir.
Bu, Latın Amerikası ölkələrində yaradılan ilk Azərbaycan diaspor təşkilatıdır. Assosiasiyanın sədri Natiq Atakişiyevdir. O, 1939-cu ildə Azərbaycanda anadan olub, fizika-riyaziyyat üzrə professordur, 1994-cü ilədək Azərbaycan Milli Elmlər Akademiyasının Fizika İnstitutunda işləmişdir. 1996-cı ildən isə akademik elmi dərəcəsi almaq uçun Milli Meksika Universitetində işə başlamışdır. Həmin vaxtdan Meksikada yaşayır. Natiq Atakişiyev bu ölkənin elmi dairələrində yüksək nüfuza malikdir.