SİYASƏT
Murmansk vilayəti hökumətinin saytında Azərbaycanın ümummilli lideri Heydər Əliyevə həsr olunmuş məqalə yerləşdirilmişdir
Bakı, 18 may (AZƏRTAC). Rusiya Federasiyasının Murmansk vilayəti hökumətinin saytında həmvətənimiz, Ümumrusiya Azərbaycan Konqresinin Murmansk vilayət bölməsinin mətbuat katibi, Rusiyanın və Azərbaycanın jurnalistlər ittifaqlarının üzvü, Murmansk vilayəti qubernatoru yanında Millətlərin İşləri üzrə Məsləhət Şurasının üzvü Əlihüseyn Şükürovun məqaləsi yerləşdirilmişdir.
Məqalədə deyilir ki, Azərbaycanın dövlətçilik tarixində dahi şəxsiyyət Heydər Əliyevin müstəsna yeri vardır. Azərbaycançılıq ideologiyasının parlaq daşıyıcısı olan Heydər Əliyev müdrik siyasəti, möhkəm etiqadı və tarixi uzaqgörənliyi ilə milli dövlətçilik ideyasının həyata keçirilməsinə, müasir Azərbaycan dövlətinin qurulmasına və xalqımızın müstəqillik arzusunun gerçəkləşməsinə nail olmuşdur. Məhz Heydər Əliyevin fəaliyyəti nəticəsində Azərbaycan özünün geostrateji, iqtisadi və mədəni potensialından istifadə edərək, Şərqlə Qərb arasında etibarlı körpü rolunu oynamağa başlamış, dünyanın ən dinamik inkişaf edən ölkələrindən birinə çevrilmişdir. Müasir, demokratik, hüquqi və dünyəvi dövlətin yaradılması, vətəndaş cəmiyyətinin təşəkkül tapması, milli-mənəvi dəyərlərə qayıdış, habelə Azərbaycanda elmin, təhsilin və mədəniyyətin inkişaf etdirilməsi əbədiyyən Heydər Əliyevin adı ilə bağlıdır. Ölkəmizin Əsas Qanununun - Konstitusiyanın qəbul edilməsi, hakimiyyətin bölgüsü prinsipinin təsbit edilməsi, hüquqi normaların və qanunverici bazanın beynəlxalq standartlara uyğunlaşdırılması, müasir idarəçilik üsullarının təsdiq edilməsi və müvafiq dövlət qurumlarının yaradılması Heydər Əliyevin rəhbərliyi altında həyata keçirilmiş irimiqyaslı quruculuq proqramının tərkib hissələri olmuşdur.
Müəllif qeyd edir ki, Azərbaycanın dünya miqyaslı neft-qaz hasilatçısına və ixracçısına çevrilməsi, milli neft strategiyasının uğurla həyata keçirilməsi, xarici ölkələrin aparıcı neft şirkətləri ilə müqavilələrin imzalanması, neft sənayesinin müasir tələblərə cavab verən infrastrukturunun yaradılması, neftin şaxələndirilmiş marşrut üzrə - Bakı-Tbilisi-Ceyhan, Bakı-Supsa boru kəmərləri ilə nəqli bilavasitə Heydər Əliyevin xidmətləridir. Dünya iqtisadiyyatına uğurlu inteqrasiya ölkə daxilində iqtisadiyyatın liberallaşdırılması, kredit reytinqinin yüksəldilməsi, iqtisadiyyatın rəqabətədavamlılığının yüksək səviyyəsi, büdcənin və valyuta ehtiyatlarının ilbəil genişləndirilməsi 1993-cü ildən başlayaraq Heydər Əliyev tərəfindən yaradılmış iqtisadiyyatın sabitliyinin əyani təsdiqidir. Azərbaycanda qeyri-neft sektorunun uğurla inkişaf etdirilməsi də Heydər Əliyevin uzaqgörənliyinin məntiqi nəticəsidir. Postsovet məkanında analoqu olmayan cəsarətli qərarları ilə seçilən Heydər Əliyev torpaqları şəxsi mülkiyyətə verməklə, ölkəmizin ərzaq təhlükəsizliyini təmin etmişdir. Hazırda müxtəlif kənd təsərrüfatı komplekslərinin uğurla fəaliyyət göstərməsi onun aqrar siyasətinin parlaq təzahürüdür.
Əlihüseyn Şükürov vurğulamışdır ki, Ulu Öndərin ordu quruculuğu sahəsində vaxtilə Cəmşid Naxçıvanski adına hərbi liseyin açılışı ilə həyata keçirməyə başladığı müdrik siyasəti Azərbaycan Silahlı Qüvvələrinin yaradılmasının bütün mərhələlərindən keçərək, Azərbaycan ordusunu Cənubi Qafqazda aparıcı hərbi gücə çevirmişdir. Ana dilimizin dövlət dili kimi işlənməsində, onun imkanlarının genişləndirilməsində və Azərbaycan xalqının ən böyük sərvəti kimi dəyərləndirilməsində Heydər Əliyev şəxsiyyətinin rolu əvəzsizdir. Azərbaycan mədəniyyətinin və zəngin tarixi irsimizin dünya ictimaiyyətinə təqdim edilməsi Heydər Əliyevin misilsiz xidmətlərindən biridir. Məhəmməd Füzulinin 500 illik yubileyinin və “Kitabi-Dədə Qorqud” dastanının 1300 illik yubileyinin UNESCO səviyyəsində qeyd edilməsi, Azərbaycan mədəniyyətinin dünyada geniş təbliğ edilməsi beynəlxalq mədəni ictimaiyyətlə əməkdaşlığın yeni formalarının bərqərar olmasına şərait yaratmışdır.
Heydər Əliyevin Azərbaycanın tarixi taleyində müstəsna xidmətləri olmuşdur. Rusiya Prezidenti onu “siyasət nəhəngi” adlandırmışdır. Ümummilli lider Heydər Əliyevin möhtəşəm əsəri olan müasir müstəqil Azərbaycan bu gün öz inkişafının yeni mərhələsinə qədəm qoymuşdur. Azərbaycan regionun qeyd-şərtsiz lideridir. Bu gün Azərbaycan siyasi və iqtisadi novasiyaları postsovet məkanında daha fəal formada tətbiq etdiyi üçün bütün dünya bu ölkə ilə maraqlanır.
Bütün bunlar Şərq müdrikliyi ilə Qərb dinamizmini özündə təcəssüm etdirən, Azərbaycanı bütün dünyaya tanıdan dahi bir şəxsiyyətin - Heydər Əliyevin möhtəşəm xidmətlərinin bəhrəsidir.