Murmanska Novruz gəlir, yaz gəlir...
Bakı, 14 mart (AZƏRTAC). Ümumrusiya Azərbaycanlıları Konqresinin (ÜAK) Murmansk vilayət şöbəsinin mətbuat katibi Əlihüseyn Şükürov AZƏRTAC-a bildirmişdir ki, martın 22-də Murmanskdakı “Laplandiya” yaradıcılıq mərkəzində Novruz bayramına həsr olunmuş təntənəli tədbir keçiriləcəkdir.
ÜAK-nın Murmansk şöbəsi konsert proqramı hazırlayır.
Qeyd etmək lazımdır ki, bayram tədbirləri “Şərq incisi” Azərbaycan özfəaliyyət ansamblının, tanınmış Azərbaycan ulduzlarının - öz həmvətənləri, habelə müxtəlif xalqların nümayəndələri qarşısında çıxış etmək üçün Murmanska dəvət olunmuş musiqiçilərin konsert proqramı ilə davam etdiriləcəkdir.
Murmansk İctimai Palatasının üzvü və ÜAK-nın Murmansk vilayət şöbəsinin sədri Afil Hüseynov AZƏRTAC-a müsahibəsində demişdir ki, Azərbaycan müstəqillik qazandıqdan sonra Novruz bayramı dövlət səviyyəsində qeyd olunmağa başlamışdır. Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın göstərdiyi səylər sayəsində 2009-cu ildə Novruz bayramı UNESCO-nun qeyri-maddi mədəni irs siyahısına daxil edilmişdir.
2010-cu ildə BMT Baş Assambleyasının 64-cü sessiyasında 21 mart günü “Beynəlxalq Novruz Günü” elan edilmişdir.
Azərbaycandan başqa, bu bayramı İran, Əfqanıstan, Tacikistan, Türkiyə, Özbəkistan və başqa ölkələrin xalqları təntənə ilə qeyd edirlər.
Bölmənin digər xəbərləri
