SİYASƏT
Murmanskda 20 yanvar şəhidlərinin anım günü qeyd olunacaqdır
Bakı, 13 yanvar (AZƏRTAC). Yanvarın 19-da və 20-də Murmanskda Ümumrespublika Hüzn Gününə - 20 yanvar faciəsinə həsr edilmiş tədbirlər keçiriləcəkdir. Tədbirlər Azərbaycan tələbələri, “Ümumrusiya Azərbaycan Konqresinin” (ÜAK) regional şöbəsinin və Rusiyanın Azərbaycanlı Gənclər Birliyinin (RAGB) fəalları tərəfindən təşkil olunmuşdur.
Şəhidlər üçün ehsan veriləcək, ruhuna dualar oxunacaq, fotosərgilər təşkil olunacaq, filmlər nümayiş etdiriləcəkdir.
Rusiya Federasiyasının Murmansk vilayətinin qubernatoru yanında Millətlər üzrə Məsləhət Şurasının üzvü Əlihüseyn Şükürov AZƏRTAC-a bildirmişdir ki, yanvarın 20-də ÜAK-ın Murmansk regional şöbəsinin ofisində faciəyə həsr olunmuş elmi-praktik konfrans keçiriləcək, Bakıdan televiziya verilişinə tamaşa ediləcək, şəhidlərin anım mərasimi keçiriləcək, onların ruhuna dualar oxunacaqdır.
Həmin gün 20 yanvar hadisələrinin 24-cü ildönümünə həsr olunmuş tədbirdə film və sənədli fotomateriallar nümayiş etdiriləcəkdir.
Qeyd etmək lazımdır ki, tədbirdə bələdiyyə və hökumət orqanlarının nümayəndələri, Rusiya Federasiyası Murmansk vilayəti İctimai Palatasının üzvləri, jurnalistlər, başqa ölkələrin və Murmanskda yaşayan xalqların diasporlarının iştirak edəcəklər.