Murmanskda Dünya Azərbaycanlılarının Həmrəyliyi Gününü qeyd etmişlər
Bakı, 31 dekabr (AZƏRTAC). Ümumrusiya Azərbaycanlıları Konqresinin (ÜAK) Murmansk vilayət şöbəsinin ofisində Dünya Azərbaycanlılarının Həmrəylik Günü ilə əlaqədar tədbir keçirilmişdir. Bu barədə AZƏRTAC-a Rusiya Federasiyası Murmansk vilayətinin qubernatoru yanında Millətlər üzrə məsləhət şurasının üzvü Əlihüseyn Şükürov məlumat vermişdir.
Gecədə Azərbaycan Prezidenti İlham Əliyevin Həmrəylik günü ilə əlaqədar dünya azərbaycanlılarına təbriki oxunmuşdur.
ÜAK-ın Murmansk şöbəsinin sədri, Murmansk vilayətinin İctimai Palatasının üzvü Afil Hüseynov demişdir ki, bu bayram hər bir azərbaycanlıda doğma Vətənə məhəbbət, onun tarixinə və mədəniyyətinə hörmət hissini möhkəmləndirir, gənc nəslə milli-mənəvi dəyərlər aşılamağa kömək edir.
Ə.Hüseynov qeyd etmişdir ki, hazırda respublikamızda sabit və sağlam ictimai-siyasi vəziyyət hökm sürür. Bütün dünya azərbaycanlılarının bu ilin yayında keçirilmiş üçüncü qurultayı ümummilli lider Heydər Əliyevin siyasi kursunun təntənəsini, onun ideyalarına xalqımızın inamını, cəmiyyətimizin siyasi kamilliyini və mütəşəkkilliyini bir daha nümayiş etdirmişdir.
Azərbaycan özünü dünyada tolerant ölkə kimi tanıtmışdır. Bu il ikinci beynəlxalq humanitar forum keçirilmişdir. Forumda iştirak edən bütün qonaqlar ölkəmizdən gözəl təəssüratlarla getmişlər. Dinlərarası, millətlərarası, sivilizasiyalararası dialoq sahəsində Azərbaycan unikal təcrübəyə malikdir və bu təcrübə bütün dünyanın diqqətini cəlb edir.
Əlbəttə, bizim müsbət təcrübəmiz, Azərbaycan cəmiyyətində müşahidə edilən gözəl atmosfer, bütün millətlərin və konfessiyaların nümayəndələrinin bir ailə kimi yaşaması bugünkü aləmdə unikal haldır. Təəssüf ki, dünyanın müxtəlif bölgələrində, müxtəlif qitələrdə ayrı-seçkilik, qarşılıqlı etimadsızlıq meylləri güclənir. Bu, çox təhlükəli meyllərdir. Azərbaycanın müsbət təcrübəsi öyrənilməlidir, geniş mənada bu təcrübədən başqa ölkələr də istifadə etməlidirlər.
Afil Hüseynov qeyd etmişdir ki, əldə olunmuş müvəffəqiyyətlərə baxmayaraq, unutmaq olmaz ki, Azərbaycan hələ müharibə şəraitində yaşayır. Regional şöbənin başçısı demişdir: “Bu gün ölkəmizin ərazi bütövlüyünü bərpa etməkdən daha vacib vəzifəmiz yoxdur. Bu, bizim ümummilli işimizdir. Təkrar qan axıdılmasının, dağıntıların və fəlakətlərin qarşısını almaq üçün biz hələ də Ermənistan-Azərbaycan, Dağlıq Qarabağ münaqişəsinin dinc yolla nizama salınmasına çalışırıq. Lakin bu məsələdə Azərbaycanın prinsipial mövqeyi dəyişməz qalır: Dağlıq Qarabağ Azərbaycanın ayrılmaz tərkib hissəsidir və münaqişə ölkəmizin ərazi bütövlüyü çərçivəsində həll edilməlidir”.
Bayram tədbirində şəhər ictimaiyyətinin nümayəndələri, regionun müxtəlif diaspor təşkilatlarının rəhbərləri, diaspor üzvləri, qonaqlar, regionun İctimai Palatasının üzvləri, jurnalistlər və başqaları iştirak etmişlər.
“Məşhur azərbaycanlılar” adlı sərgidə ölkəmiz haqqında nəşrlər, tanınmış həmvətənlərimizin fotoşəkilləri nümayiş etdirilmişdir.
Qeyd etmək lazımdır ki, ÜAK şöbəsinin fəalları Dünya Azərbaycanlılarının Həmrəylik Günü haqqında Murmansk vilayəti hökumətinin rəsmi saytında və bir sıra vilayət KİV-lərində dərc olunmuş məqalələr hazırlamışlar.
Bayram dostluq şəraitində keçmişdir. Qonaqlar - müxtəlif milli icmaların, yerli ictimaiyyətin və KİV-lərin nümayəndələri Rusiya ilə Azərbaycan arasında, ölkələrimizin xalqları arasında dostluqdan söhbət açmışlar.
Tədbir Murmanskın orta və ali məktəblərində təhsil alan həmvətənlərimizin konsert proqramı ilə davam etmişdir.
Bölmənin digər xəbərləri
