NİKOLAYEVDƏ UAK-IN SƏYYAR İCLASI KEÇİRİLMİŞDİR
AZƏRTAC-ın xüsusi müxbiri xəbər verir ki, Nikolayevdə Ukrayna Azərbaycanlıları Konqresi (UAK) rəhbər heyətinin səyyar iclası keçirilmişdir. İclasda UAK-ın Nikolayev, Krım, Xerson və Odessa regional təşkilatlarının başçıları və fəalları iştirak etmişlər.
UAK-ın sədri Akif Gülməmmədov bildirmişdir ki, Azərbaycan dövləti təməli ümummilli liderimiz Heydər Əliyev tərəfindən qoyulmuş və Prezident İlham Əliyevin uğurla davam etdirdiyi dövlət siyasətini həyata keçirərək, yaşadığı yerdən asılı olmayaraq, hər bir azərbaycanlının hüquqlarını bundan sonra da fəal şəkildə qoruyacaq, millətin birləşməsi işinə maksimum kömək edəcəkdir.
Konqresin başçısı regional təşkilatların fəallarını UAK-ın nizamnaməsinə əlavələr və dəyişikliklərin müzakirəsində yaxından iştirak etməyə, erməni tapdağı altında olan ərazilərin azad edilməsi uğrunda Azərbaycan xalqının ədalətli mübarizəsi barədə Ukrayna ictimaiyyətinə məlumat verməyə, uydurma “erməni soyqırımı” haqqında əfsanəni puça çıxarmağa, Azərbaycanın daxili və xarici siyasət sahəsində qazandığı uğurlardan danışmağa çağırmışdır.
Toplaşanlar Nikolayev vilayətinin “Avtoqraf. Vek XXI” jurnalının baş redaktoru, xalqımızın səmimi dostu Anna Korolu alqışlarla qarşılamışlar. Ermənistan-Azərbaycan, Dağlıq Qarabağ münaqişəsini obyektiv işıqlandıran A.Korol Nikolayev vilayətinin Azərbaycan diasporu haqqında xoş sözlər demiş, düşmənlə mübarizədə səyləri birləşdirməyə çağırmışdır.
Bölmənin digər xəbərləri
