OPERATİV QƏRARGAHLAR RUSİYADAKI HƏMVƏTƏNLƏRİMİZƏ HÜQUQİ YARDIM EDİRLƏR
AZƏRTAC-ın xüsusi müxbiri xəbər verir ki, yeni miqrasiya qaydaları ilə əlaqədar Rusiyada yaşayan həmvətənlərimizə yardım məqsədi ilə Moskvada və Rusiyanın digər rayonlarında operativ qərargahlar fəaliyyət göstərir. Qərargahlar ölkə Prezidenti İlham Əliyevin tapşırığı ilə yaradılmışdır. Bundan əvvəl Rusiya Federasiyasında əmək fəaliyyəti ilə məşğul olan vətəndaşlarımıza yardım üçün dövlətimizin başçısının tapşırığı ilə hökumət komissiyası təşkil olunmuşdur. Komissiyaya baş nazirin birinci müavini Yaqub Eyyubov başçılıq edir. Hökumət komissiyasının Xarici Ölkələrdə Yaşayan Azərbaycanlılarla İş üzrə Dövlət Komitəsi, Ümumrusiya Azərbaycan Konqresi, Əmək və Əhalinin Sosial Müdafiəsi və Daxili İşlər nazirlikləri tərəfindən hazırlanan proqramına əsasən, Moskvada, Sankt-Peterburqda, Yekaterinburqda, Nijni Novqorodda, Çeboksarıda, Volqoqradda, Rostov-Donda, Novosibirskdə, Xabarovskda, Ulan-Udedə yaradılmış operativ qərargahlarda həmvətənlərimizə hüquqi yardım göstərilir. Qərargahların təşkili və fəaliyyəti Ümumrusiya Azərbaycan Konqresi və onun regional bölmələrinə həvalə olunmuşdur. Bu işə ÜAK-ın icraçı direktoru Eldar Quliyev başçılıq edir.
Qərargahların işi üzrə rəhbərin müavini, ÜAK Moskva regional bölməsinin başçısı İlqar Hacıyev AZƏRTAC-ın müxbirinə bildirmişdir ki, Moskvadakı “Bakı” kinoteatrında yaradılmış qərargah indiyədək 400-dən çox həmvətənimizə hüquqi və qanuni yardım göstərmişdir. Onun sözlərinə görə, qərargah hər gün fəaliyyətdədir və burada bir neçə yüksəkixtisaslı hüquqşünas var. O demişdir: “Suallar, əsasən, leqallaşma üçün sənədlərin rəsmiləşdirilməsi qaydaları ilə bağlıdır. Hüquqşünaslar ixtisaslı hüquq məsləhətləri verir və zəruri sənədlərin rəsmiləşdirilməsinə kömək edirlər. Eyni zamanda, zəruri sənədlər, Azərbaycan səfirliyinin, konsul xidmətinin, ÜAK-ın, onun Moskva regional bölməsinin və digər regional bölmələrin ünvanlarından ibarət yaddaş vərəqəsi hazırlanmışdır. Hüquq mühafizə orqanları tərəfindən qanunsuz hərəkətlərə yol verildiyi təqdirdə müraciət etmək üçün telefon nömrələri və ünvanlar da göstərilmişdir”.
İ.Hacıyev bildirmişdir ki, Xaricdə Yaşayan Azərbaycanlılarla İş üzrə Dövlət Komitəsi qərargahları lazımi texnika və avadanlıqla təchiz etməyə başlamışdır. Fasiləsiz “Skayp” rabitəsi də yaradılmışdır ki, bu da qərargahların bir-biri ilə əlaqə saxlamasını xeyli asanlaşdırmışdır. ÜAK-ın Moskva bölməsinin rəhbəri demişdir ki, vətəndaşlarımız dövlətin dəstəyini hiss edir və onların problemlərinin həlli üçün yaradılmış şəraitə görə təşəkkürlərini bildirmişlər.
Bölmənin digər xəbərləri
