Qazaxıstanda Novruz şənliyi təşkil edilmişdir
Astana, 22 mart (AZƏRTAC). Astanada, Qazaxıstan Azərbaycanlıları Mədəni Mərkəzləri İttifaqının (QAMMİ) və “Xəzər” Cəmiyyətinin birgə təşəbbüsü ilə Novruz şənliyi təşkil edilmişdir.
Mərasimdə Azərbaycanın Qazaxıstandakı səfirliyinin əməkdaşları Astanada yaşayan azərbaycanlıları Novruz bayramı münasibətilə təbrik etmişlər.
Tədbirdə QAMMİ-nin sədri Vidadi Salahov 2010-cu il fevralın 23-də BMT Baş Məclisinin 64-cü sessiyasının iclasında martın 21-nin Beynəlxalq Novruz günü kimi elan olunmasını yüksək qiymətləndirmiş və vurğulamışdır ki, bu qərar bir çox ölkələrdə olduğu kimi Qazaxıstanda da bu bayramın daha maraqlı keçirilməsinə təkan yaratmışdır.
Tədbirdə çıxış edən digər natiqlər də ölkələrimiz və xalqlarımız arasında mövcud olan qırılmaz tarixi əlaqələrdən, ortaq mədəni dəyərlərdən, adət-ənənələr, dil və din bağlılığından söz açmış və qeyd etmişlər ki, bütün bunlar səmərəli əməkdaşlıq üçün geniş imkanlar yaradır.
Bayram “Xəzər” instrumental və rəqs ansamblının ifasında Azərbaycan mahnıları və rəqsləri ilə davam etdirilmiş, Novruz bayramının bəzəyi olan səməni və Azərbaycan şirniyyatları süfrələri bəzəmişdi.
Tədbirdə aşıq Ədalət Qaraşov da iştirak edərək, Azərbaycanın məşhur saz musiqisi nümunələrini ifa etmişdir.
İlahə Əhmədova
AZƏRTAC-ın xüsusi müxbiri
Astana
Bölmənin digər xəbərləri
