Qəbələ, 11 iyun (AZƏRTAC). Yay turizm mövsümünün başlanması ilə əlaqədar Qəbələ rayonundakı istirahət mərkəzlərində vətəndaşlara göstərilən xidmətlərə görə qiymətlər xeyli ucuzlaşmışdır.

Rayon mədəniyyət və turizm şöbəsindən AZƏRTAC-a bildirmişlər ki, istirahət mərkəzlərində qonaqlara müasir otel xidmətləri ilə yanaşı, Azərbaycan və Avropa yeməkləri təklif olunur.

Rayonun istirahət mərkəzləri otel xidmətlərinə 15-20 manatadək, restoran xidmətlərinə isə 10 faizədək endirim etmişlər. Meşələrdə və çayların sahilində yerləşən istirahət guşələrində üçotaqlı kottecin bir günlük kirayə haqqı 90-100 manatdan 70-80 manata endirilmişdir. Rayon mərkəzindəki otellərdə isə iki nəfərlik otaqları indi bir günü 30 manata sifariş etmək olar.

Beşulduzlu otellər və istirahət mərkəzlərinin əksəriyyəti qonaqlara meşə gəzintisi, atla gəzinti, balıq ovu, qayıqla göldə üzmək, rayonun görməli yerlərinə və tarixi abidələrinə səyahətlər təşkil edir. Qəbələdə turistlərin ən çox üz tutduğu yerlərdən biri olan “Qəbələnd” istirahət və əyləncə mərkəzində də qiymətlərə endirimlər edilmişdir.

2012-ci ildə Qəbələ rayonuna gələn yerli və xarici turistlərin sayı 45 min 500 nəfər olmuşdur, bu da əvvəlki illə müqayisədə 9650 nəfər çoxdur. Turistlərdən 31 min 350-si yerli, 14 min 150 nəfəri isə xarici ölkə vətəndaşlarıdır. Qonaqların 38 min 500-ü müxtəlif turizm obyektlərində istirahət etmiş, 5400-ü işgüzar səfərdə olmuş, 1600 nəfəri isə sanatoriyada müalicə almışdır.

Ümumiyyətlə isə Qəbələ rayonuna gələn turistlərin sayı son 4 ildə üç dəfə artmışdır.