RUSİYADA YAŞAYAN AZƏRBAYCANLILARIN PROBLEMLƏRİNİN HƏLLİ İLƏ BAĞLI MÜHÜM ADDIMLAR ATILIR
Azərbaycan dövləti və hökuməti öz vətəndaşlarının üzləşə biləcəkləri problemi vaxtında həll etmək üçün qabaqlayıcı addımlar atır. Prezident İlham Əliyev Rusiya Federasiyası (RF) ərazisində ticarətlə məşğul olan Azərbaycan vətəndaşlarının rastlaşacağı problemlərin həlli məqsədi ilə müvafiq Sərəncam imzalamış və sənədə uyğun olaraq Dövlət Komissiyası yaradılmışdır.
Dövlət Komitəsi Ümumrusiya Azərbaycan Konqresi (ÜAK) ilə birlikdə Sərəncamdan irəli gələn vəzifələri yerinə yetirmək məqsədi ilə tədbirlər görür. ÜAK–ın özü də bu istiqamətdə xeyli işlər görmüşdür.
ÜAK-ın icraçı direktoru Eldar Quliyev AZƏRTAC-a bildirmişdir ki, bu məqsədlə Rusiyanın müxtəlif dövlət və hökumət strukturlarının, Moskvadakı digər diaspor təşkilatları nümayəndələrinin iştirakı ilə “dəyirmi masa” keçirilmiş, vəziyyət ətraflı müzakirə olunmuşdur. Görüşdə miqrantların vəziyyəti və yaranmış vəziyyətdən çıxış yolları araşdırılmışdır. Bir fikir xüsusi vurğulanmışdır ki, RF hökumətinin qərarına soyuqqanlılıqla yanaşılmalı, heç bir gərginlik yaratmadan problemin qanuni yolla həllinə nail olunmalıdır. Biz problemin həllində maraqlıyıq və bunun üçün Rusiya hökuməti ilə birbaşa əlaqələr yaratmışıq. Rusiyanın özü də problemin həllində maraqlıdır və müxtəlif yollar axtarılır.
ÜAK problemlə əlaqədar qərargah yaratmışdır. Quruma cəlb olunmuş təcrübəli hüquqşünaslar Azərbaycandan gələnlərin hüquqlarını ən yüksək səviyyədə müdafiə edəcək, problemlərinin həllinə çalışacaqlar. Azərbaycan Prezidentinin məlum Sərəncamından irəli gələn tələblərin yerinə yetirilməsi üçün bütün qüvvələr səfərbər olunmuşdur. Problemin həlli ilə bağlı təkliflər hazırlanaraq Dövlət Komissiyasına təqdim edilmişdir.
E.Quliyev onu da qeyd etmişdir ki, Xarici Ölkələrdə Yaşayan Azərbaycanlılarla İş üzrə Dövlət Komitəsinin atdığı addımlar da təqdirəlayiqdir. Ümumiyyətlə, Dövlət Komitəsinin Vətəndən uzaqda yaşayan soydaşlarımızla bağlı atdığı addımlar, diaspor təşkilatlarımızın vahid mərkəzdən əlaqələndirilməsi istiqamətində görülən işlər yüksək qiymətləndirilir. ÜAK Dövlət Komitəsinin keçirdiyi bütün tədbirlərdə yaxından iştirak edir.
Konqres Azərbaycan-Rusiya mədəni əlaqələrinin inkişaf etdirilməsi, xalqlarımızın daha da yaxınlaşması məqsədi ilə ciddi iş aparır, müxtəlif tədbirlər görür. Bu məqsədlə Şəhriyarın 100 illiyinə həsr olunmuş geniş konsert təşkil olunmuş, Rusiya Rəssamlıq Akademiyasında SSRİ xalq rəssamı Mikayıl Abdullayevin rəsm sərgisi açılmışdır. Dünya Azərbaycanlılarının həmrəyliyi günü də yüksək səviyyədə qeyd ediləcəkdir.
Bölmənin digər xəbərləri
