Şahdağ Qış-Yay Turizm Kompleksində qış mövsümündə növbəti iki mehmanxananın açılışı planlaşdırılır
Bakı, 23 aprel (AZƏRTAC). Bu gün daxili statistikadan daha çox danışmaqda maraqlıyıq. Çünki Azərbaycanda iki cəlbedici turizm məkanı formalaşmışdır. Bunlardan birincisi Qəbələdir. Çünki burada infrastruktur daha əlverişlidir. İkincisi isə Qusarda yaradılmış Şahdağ Qış-Yay Turizm Kompleksidir.
AZƏRTAC xəbər verir ki, bunu mədəniyyət və turizm naziri Əbülfəs Qarayev jurnalistlərə müsahibəsində demişdir.
Nazir bildirmişdir ki, Şahdağ Qış-Yay Turizm Kompleksində inşaat işlərinin ilkin mərhələsi həyata keçirilmişdir. Növbəti illərdə ora turist axınının daha çox olmasında maraqlıyıq. Qarşıdakı yay mövsümündə kompleks xidmət göstərməyəcəkdir. Çünki orada ikinci mərhələnin inşaat işləri tamamlanmalıdır.
Ə.Qarayev demişdir ki, kompleksdə qış mövsümündə növbəti iki mehmanxananın açılışını planlaşdırırıq ki, bununla da burada bütün mövsümlərdə istirahət etmək imkanı yaranacaqdır. Birinci mərhələdən fərqli olaraq ikinci mərhələdə görüləcək işlərə investorlar da cəlb olunacaqdır. Artıq onların təkliflərinə baxılır.
Bölmənin digər xəbərləri
