Səfər Sadiqi: Ölkəmizin dünyada gündən-günə artan nüfuzu biz azərbaycanlıları sevindirir
Kopenhagen, 11 may (AZƏRTAC). Ölkəmizin dünyada gündən-günə artan nüfuzu, bir sıra beynəlxalq tədbirlərə ev sahibliyi etməsi, Odlar Yurdu olaraq tanınması biz azərbaycanlıları sevindirir. Azərbaycan artıq bir Avropa paytaxtıdır.
Bu sözləri Danimarkada yaşayan həmvətənimiz, bu ölkədə fəaliyyət göstərən “Vətən” Cəmiyyətinin sədri Səfər Sadiqi AZƏRTAC-ın müxbirinə müsahibəsində demişdir.
“Vətən” Cəmiyyətinin 2007-ci ilin martından fəaliyyət göstərdiyini bildirən Səfər Sadiqi rəhbəri olduğu qurumun ötən illər ərzində Azərbaycanın tarixini, mədəniyyətini, incəsənətini təbliğ etdiyini vurğulamışdır. Fəaliyyətlərinin əsas məqsədi Danimarkada yaşayan azərbaycanlılarımızı bir araya toplamaq olduğunu söyləyən Cəmiyyətin sədri bu sahədə görülən işləri diqqətə çatdırmışdır.
“Türk Günü” ilə bağlı keçirilən tədbir barədə danışan “Vətən” Cəmiyyətinin sədri Danimarkada fəaliyyət göstərən bu qurumun digər millətlərin nümayəndələri ilə sıx fəaliyyətdə olduğunu bildirərək demişdir: “Vətən” Cəmiyyətinin təşkilatçılığı ilə biz Danimarkada silsilə tədbirlər keçiririk. Biz danimarkalıları əsasən Azərbaycanın tarixi, 20 faiz torpağının Ermənistan tərəfindən işğalı, ölkəmizin bir milyona yaxın qaçqın-köçkününün olması barədə məlumatlandırırıq. Xocalı soyqırımı ilə bağlı təşkil olunan sonuncu mərasimdə 600-dən yuxarı buklet paylanılmışdır. Danimarkalılara və paytaxt Kopenhagendə yaşayan əcnəbilərə faciənin dəhşətləri barədə məlumat verdik.
Daha sonra biz “Azərbaycan Evi”ndə yığılaraq buraya toplaşan danimarkalılara və əcnəbi qonaqlara faciənin dəhşətlərindən bəhs edən videomateriallar nümayiş etdirdik. Biz, həmçinin Novruz və digər milli bayramlarımızı da bir yerdə qeyd edirik. Burada yaşayan danimarkalı dostlarım Azərbaycanı turist kimi gəzmək istəyirlər. İstərdim ki, digər avropalılar da bizim xalqın nə qədər qonaqpərvər, istiqanlı olduqlarını görsünlər, həmçinin danimarkalılar da ölkəmiz barədə məlumatlı olsunlar”.
Danimarkada yaşayan azərbaycanlı uşaqlara da Azərbaycanın tarixi, mədəniyyəti barədə bilgilər verməyə çalışdıqlarını söyləyən Səfər Sadiqi bunun nəticəsi olaraq qürbət ölkədə yaşayan hər bir azərbaycanlı uşağın ölkəmizin adını eşitdikdə sevindiklərini və azərbaycanlı olduqları üçün fəxr etdiklərini vurğulamışdır. Danimarka parlamentində deputatlarla tez-tez görüşlər keçirdiyini bildirən Cəmiyyətin sədri dəfələrlə ölkənin təhsil və gənclər naziri Kristina Antanore ilə görüşdüklərini qeyd edərək demişdir: “Yeniyetmələr və gənclərimiz də təhsil aldıqları ali təhsil ocaqlarında ölkəmizin təbliğinə çalışırlar. Kopenhagen Universitetində Azərbaycan ilə bağlı kitab sərgisini təşkil edəcəyik. “Vətən” Cəmiyyəti dövlətimizin başçısının yürütdüyü siyasəti tam müdafiə edir. Biz Azərbaycan Prezidenti İlham Əliyevin “Azərbaycanın bir qarış torpağı da müzakirə mövzusu deyil” fikrini daim dəstəkləyirik. Azərbaycanın iqtisadi inkişafı, Avropaya inteqrasiyası biz azərbaycanlıları həmişə sevindirir. Ölkəmiz Avropanın enerji təhlükəsizliyinin təmin olunmasında mühüm rol oynayır. Biz fəxr edirik ki, bu gün Azərbaycan regionda ən inkişaf etmiş ölkədir. Tolerant ölkə olan Azərbaycanda müxtəlif dinlərin nümayəndələri sülh şəraitində yaşayırlar. İqtisadi inkişafımız artıq göz qabağındadır və Avropa ölkələri tərəfindən qəbul edilir. Bu, bizə baş ucalığı gətirir və bununla fəxr edirik!”.
Anar Rzayev
AZƏRTAC-ın müxbiri
Kopenhagen
Bölmənin digər xəbərləri
