“Skal Bakı”nın 20-ci yubiley toplantısı keçirilib
Bakı, 19 aprel, AZƏRTAC
Səyahət və Turizm Peşəkarları Beynəlxalq Assosiasiyasının ("Skal İnternational") Bakı klubunun 20-ci yubiley toplantısı keçirilib. Bu toplantı eyni zamanda "Skal Bakı" klubunun yeni başkanının seçilməsi ilə yadda qalıb.
AZƏRTAC xəbər verir ki, tədbirdə çıxış edən "Skal Bakı" klubunun başkanı, professor Cəfər Cəfərov ötən müddət ərzində görülən işlərdən söz açıb. Bildirib ki, MDB məkanında ilk dəfə olaraq Bakıda yaradılan qurum 7 il əvvəl fəaliyyətə başlayıb və bu müddətdə Azərbaycan turizminin inkişafı üçün xeyli işlər görüb. Onun sözlərinə görə, skal turizm peşəkarlarının könüllü birliyidir və dostlar arasında biznes yaratmaq missiyası daşıyan bir təşkilatdır.
Rəhbərlik etdiyi 2 il ərzində klubun fəaliyyətindən danışan Cəfər Cəfərov deyib ki, bu müddətdə qurumun 4 geniş tərkibli iclası, müxtəlif mövzularda təlim və treninqlər də daxil olmaqla, toplam 20-dən çox tədbiri keçirilib.
Toplantıda iştirak etmək məqsədilə Bakıya gələn "Skal Mərmərə" klubunun başkanı Zeynəb Yılmaz deyib ki, hazırda dünyanın 83 ölkəsində 381 skal klubu fəaliyyət göstərir. Bu təşkilatların da 17 min üzvü var. Onun sözlərinə görə, Türkiyədə bu təşkilatın fəaliyyətinə çox böyük önəm verilir: "Türkiyədə 17 skal klubunun 1100 üzvü var. Üç skal klubunun da yaxın günlərdə yaradılması nəzərdə tutulur. Skalın fəaliyyətinə görə Türkiyə dünyada 4-cü yerdədir. Bizim məqsədimiz Türkiyə turizminə xidmət etməkdir. Ona görə də biz əvvəl bir-birimizlə, sonra isə beynəlxalq səviyyədə əlaqələr qururuq. Skal üzvləri dünyanın harasında olurlarsa-olsunlar, bir-birinə bir çox böyük güzəştlər edirlər".
Azərbaycanda bir çox layihələr həyata keçirəcəklərini deyən klub başkanı bildirib ki, yaxın günlərdə Bakıda Türkiyə skalçılarının da iştirakı ilə geniş bir toplantı və müxtəlif vorkşoplar təşkil edəcəklər. O, birlikdə çalışmağın səmərəli olduğunu da diqqətə çatdırıb.
Sonra "Skal Bakı" klubunun yeni başkanı "Park İnn" hotelinin baş meneceri Əhməd Yaşıldağ seçilib.
Azərbaycan Sağlamlıq və Termal Turizmə Dəstək Assosiasiyasının sədri Ruslan Quliyev deyib ki, skalın fəaliyyəti Azərbaycan turizminin daha geniş çevrədə təbliği və təşviqidir. O, türkiyəli turizmçini "Skal Bakı"ya başkan təyin etməklə, gələcəkdə daha böyük uğurlar əldə edəcəklərinə inandığını bildirib: "Əhməd Yaşıldağ Türkiyədə "Skal Mərmərə" klubunun fəal üzvlərindən olub. Onun bu sahədə zəngin təcrübəsi var. Ümid edirəm ki, Əhməd bəy öz rəhbərliyi ilə klubumuzun daha effektli fəaliyyətinə nail olacaq".
Əhməd Yaşıldağ öz növbəsində bildirib ki, 20 ildir bu təşkilatın üzvüdür: "Skal üzvü olmaqla bir anda dünyadakı bütün skalçılarla yoldaş olursan. Azərbaycanda olduğum 3 il ərzində "Skal Bakı"nın 7-8 toplantısında iştirak etmişəm. Öz müşahidələrimə əsasən deyə bilərəm ki, Azərbaycan turizm sahəsində inkişaf etmək üçün var qüvvəsi ilə çalışır. Biz də skalçılar olaraq bu inkişafa öz töhfəmizi verməliyik. Bu yöndə artıq bir neçə planımız da var. Qəbələdə, Qubada, Naftalanda yaxın vaxtlarda skal klubları yaratmaq niyyətindəyik".
Sonra "Skal Mərmərə" klubu ilə "Skal Bakı" klubu twinninq (qardaş) klublar elan edilib və bununla bağlı sənəd imzalanıb.
Tədbirin rəsmi hissəsi skal tostu və xatirə şəklinin çəkilməsi ilə yekunlaşıb.
Bölmənin digər xəbərləri
