Sosial xidmətin inkişafına dair Dövlət Proqramı ilə bağlı müzakirələr aparılıb
Bakı, 7 may, AZƏRTAC
İqtisadi İslahatların Təhlili və Kommunikasiya Mərkəzində (İİTKM) “Azərbaycan Respublikasında sosial xidmətin inkişafına dair 2023–2026-cı illər üçün Dövlət Proqramı”nda nəzərdə tutulmuş tədbirlərin icrasının 2024-cü il üzrə monitorinq hesabatı müzakirə edilib.
Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə əlaqələr şöbəsindən AZƏRTAC-a verilən məlumata görə, İİTKM-in icraçı direktoru Vüsal Qasımlı Dövlət Proqramının uğurla icra olunduğunu vurğulayaraq 2024-cü il üzrə icrası hədəflənən işlərə dair monitorinq nəticələri barədə məlumat verib. Bildirilib ki, Azərbaycanda əhalinin sosial xidmətlərlə daha keyfiyyətli və əhatəli şəkildə təmin olunması ölkədə həyata keçirilən sosial siyasətin əsas tərkib hissələrindən birini təşkil edir. Bu məqsədlə indiyədək çoxsaylı qanunvericilik aktları və qərarlar qəbul edilib, nəticədə həssas əhali qruplarına daxil olan şəxslərin sosial xidmətlərə çıxışı və həmin xidmətlərdən faydalanma səviyyəsi baxımından əhəmiyyətli irəliləyişlər əldə olunub.
“Sosial xidmət haqqında” Qanuna edilən son dəyişikliklərin nəticəyönümlü yanaşmanın tətbiqini daha da təşviq edəcəyi qeyd olunub. Eyni zamanda, Dövlət Proqramında nəzərdə tutulan hədəflər üzrə xidmətlərin rəqəmsallaşdırılmasının proqramın icrasında şəffaflığın və hesabatlılığın artırılmasında mühüm rol oynayacağı vurğulanıb.
Əmək və əhalinin sosial müdafiəsi nazirinin müavini Hidayət Abdullayev Dövlət Proqramının icrası sahəsində belə müzakirənin təşkil edilməsinin əhəmiyyətli olduğunu bildirib. O, Dövlət Proqramı çərçivəsində həssas qruplara göstərilən sosial xidmətlərin kəmiyyət və keyfiyyətinin, bu xidmətlərə əlçatanlığın artırılması istiqamətində müvafiq tədbirlərin nəzərdə tutulduğunu deyib. Nazir müavini, həmçinin son illər sosial xidmətlər sahəsində aparılan islahatları və əldə olunan nailiyyətləri diqqətə çatdırıb. Sosial xidmət müəssisələrinin müasir tələblərə uyğun qurulması, yeni belə müəssisələrin yaradılması, sosial xidmətlərin keyfiyyətinin yüksəldilməsi və əhatə dairəsinin genişləndirilməsi istiqamətində atılan addımları qeyd edib.
Sonra İİTKM-in İqtisadi təhlil şöbəsinin müdir müavini Elnur Ələkbərov Dövlət Proqramı çərçivəsində 2024-cü il üzrə monitorinq nəticələrini təqdim edib, müəyyənləşdirilmiş prioritetlərə uyğun olaraq həyata keçirilən ən mühüm layihələri, həmçinin müzakirəsi vacib məsələləri diqqətə çatdırıb.
Təqdimatdan sonra müzakirəyə çıxarılan məsələlərlə bağlı ƏƏSMN-in aidiyyəti struktur bölmələrinin rəhbərləri tərəfindən icrası davam edən və görüləcək tədbirlər barədə ətraflı məlumat verilib. Dövlət Proqramı üzrə 2026-cı ilin sonunadək hamı üçün bərabər iştirak imkanını təmin edən sosial xidmətlər sisteminin, sosial xidmət sahəsində ixtisaslı kadr potensialının formalaşması, sosial xidmətin əhatəsinin genişlənməsi və s. ilə bağlı hədəflərin nəzərdə tutulduğu qeyd olunub.
Qeyd edək ki, Prezident İlham Əliyevin “Azərbaycan Respublikasında sosial xidmətin inkişafına dair 2023–2026-cı illər üçün Dövlət Proqramı”nın təsdiq edilməsi haqqında müvafiq Sərəncamı ilə Dövlət Proqramında nəzərdə tutulmuş tədbirlərin monitorinq və qiymətləndirilməsini İİTKM həyata keçirir.
Bölmənin digər xəbərləri
