Sumıda UAK-nın yeni sədri seçilmiş və ilk Azərbaycan bazar günü məktəbi açılmışdır
Bakı, 18 fevral (AZƏRTAC). Fevralın 17-də Sumıda şəhərin Azərbaycan icmasının həyatında iki mühüm hadisə baş vermişdir: birincisi, UAK-nın Sumı vilayət regional təşkilatının iclası keçirilmiş və iclasda yeni sədr seçilmiş, ikincisi, ilk Azərbaycan bazar günü məktəbi açılmışdır.
Sədr vəzifəsinə eyni zamanda üç namizəd iddia edirdi, lakin onlardan ikisinin - Sumı vilayəti Milli Azlıqlar Assosiasiyasının prezidenti Babazadə Bayramovun və UAK-nın vilayət regional təşkilatının keçmiş başçısı Vahid Qurbanovun öz namizədliklərini geri götürməsi nəticəsində əsas iddiaçı Sumı Rayon Sovetinin deputatı Əli Qurban oğlu Vəliyev olmuşdur. Məhz o, yekdilliklə yeni sədr seçilmişdir. Qeyd etmək lazımdır ki, seçkilər demokratik şəraitdə keçmiş, opponentlər bütün digər azərbaycanlılara nümunə göstərərək Əli Vəliyevi təbrik edərək ona bu məsul vəzifədə uğurlar arzulamışlar. Yeni seçilmiş sədri Ukraynanın Azərbaycan diasporunun başçısı Hikmət Cavadov da təbrik etmişdir. Bunu AZƏRTAC-a Ukrayna Azərbaycanlıları Konqresindən bildirmişlər.
Şəhər administrasiyası tərəfdən iclasda baş idarə rəisinin müavini - İctimaiyyətlə əlaqələr üzrə baş idarənin Daxili siyasət məsələləri idarəsinin rəisi İvan Şkurat və Sumı şəhərinin Azərbaycan diasporunun nümayəndələri iştirak etmişlər. İclasda Ukraynanın Azərbaycan diasporunun qarşısında duran ilkin vəzifələr və fond yaradılması məsələsi müzakirə olunmuşdur. İclasın keçirilməsinin, habelə Sumıda Azərbaycan diasporunun birləşməsinin təşəbbüsçüsü vilayət Radasının deputatı Əfqan Salmanovdur. O, təkcə sözü ilə deyil, həm də işi ilə digər azərbaycanlılara nümunə göstərir.
Ukraynanın Azərbaycan diasporunun başçısı Hikmət Cavadov Sumı şəhərinin Azərbaycan diasporunun nümayəndələri ilə birlikdə 13 nömrəli məktəbdə yeni Azərbaycan bazar günü məktəbinin təntənəli açılışında da iştirak etmişdir. Hikmət Cavadov öz çıxışında qeyd etmişdir ki, Sumıda yeni bazar günü məktəbinin açılması təkcə şəhərdə yaşayan azərbaycanlılar üçün deyil, həmçinin Ukraynanın bütün Azərbaycan diasporu üçün böyük sevincdir. Ukraynanın Azərbaycan diasporunun başçısı yerli teleradio şirkətinə verdiyi müsahibədə bu işdə böyük kömək göstərdiklərinə görə şəhərin və məktəbin rəhbərliklərinə minnətdarlığını bildirmişdir. Hikmət Cavadov belə hesab edir ki, başlıca vəzifə böyüməkdə olan nəslin tərbiyəsidir: Azərbaycan, habelə qarışıq Ukrayna-Azərbaycan ailələrində böyüyən uşaqların ana dilinə - Azərbaycan dilinə yiyələnmək, habelə Azərbaycanın qədim zəngin tarixini və mədəniyyətini öyrənmək, xalq adət-ənənələri ilə tanış olmaq imkanı olmalıdır.
Hikmət Cavadovun sözlərinə görə, yaxın gələcəkdə hüquq klinikasının açılması, Sumı vilayəti azərbaycanlılarının siyahıya alınması, habelə Sumıda təhsil alan Azərbaycan tələbələri ilə daha sıx əlaqə yaradılması nəzərdə tutulur.
Bölmənin digər xəbərləri
