SİYASƏT
Tbilisidə azərbaycanlıların həmrəylik günü münasibətilə tədbir keçirilmişdir
Tbilisi, 31 dekabr (AZƏRTAC). Dekabrın 30-da Tbilisidə Gürcüstan Azərbaycanlılarının Milli Konqresinin təşəbbüsü ilə Dünya Azərbaycanlılarının Həmrəylik Günü münasibətilə tədbir keçirilmişdir.
Konqresin sədri Əli Babayev iştirakçıları əlamətdar bayram münasibətilə təbrik etmiş, ümummilli lider Heydər Əliyevin uzaqgörən siyasəti nəticəsində yaradılmış həmrəylik gününün Dünya azərbaycanlılarının birliyi və təşkilatlanması istiqamətində böyük əhəmiyyət kəsb etdiyini bildirmişdir.
Azərbaycan Jurnalist Qadınlar Assosiasiyasının rəhbəri Sevil Yusifova demişdir ki, bu bayramımız bütün özəllikləri ilə yanaşı, dünya azərbaycanlılarının bir araya gəlməsi baxımından da çox önəmlidir. Ulu öndərimiz Heydər Əliyevin şəxsi təşəbbüsü ilə baş tutmuş həmrəylik günü artıq ümumxalq bayramına çevrilmişdir.
S.Yusifova qeyd etmişdir ki, Prezident İlham Əliyev dünya azərbaycanlılarına böyük diqqət və qayğı göstərir. Gürcüstan paytaxtında azərbaycanlıların həmrəylik gününün qeyd olunması təsadüfi deyildir. Gürcüstan Azərbaycanın strateji tərəfdaşıdır, əsrin qlobal layihələri Heydər Əliyevin şəxsi cəsarəti sayəsində məhz bu ölkədən keçməklə gerçəkləşmişdir, buraya Azərbaycan investisiyasının yatırımı getdikcə artır. Bütün bunlar bu bayramın həm də gürcülərin bayramı olduğunu deməyə əsas verir.
Gürcüstanın Reinteqrasiya məsələləri üzrə Dövlət Nazirliyinin məsul əməkdaşı Savalan Mirzəyev qeyd etmişdir ki, Gürcüstanda həmrəylik gününün yüksək səviyyədə keçirilməsi artıq ənənəyə çevrilmişdir və bu mərasimdə gürcü ictimaiyyətinin görkəmli nümayəndələrinin iştirakı təqdirəlayiqdir. Bu bizim cəmiyyətə inteqrasiyamızla yanaşı, həm də gürcü xalqına tariximiz, mədəniyyətimiz, adət-ənənələrimiz barədə dəqiq məlumat verilməsi baxımından da önəmlidir.
Tədbirdə Azərbaycan Respublikası Dövlət Neft Şirkətinin Gürcüstan nümayəndəliyinin məsul əməkdaşı Şövqi Mehdizadə, Gürcüstan parlamentinin deputatı Mahir Dərziyev və başqaları iştirakçılara əlamətdar bayram münasibətilə xoş arzularını çatdırmışlar.
Mərasim konsert proqramı ilə davam etdirilmişdir.
İslam Əliyev
AZƏRTAC-ın xüsusi müxbiri
Tbilisi