Turistlər Şahdağ qış-yay turizm kompleksi ilə maraqlanmağa başlamışlar
Bakı, 31 dekabr (AZƏRTAC). Azərbaycan Turizm Assosiasiyası artıq xarici tərəfdaşlarından Qusarda yerləşən Şahdağ Qış-Yay Turizm Kompleksinə turist səfərləri ilə bağlı müraciətlər qəbul etməyə başlamışdır.
Assosiasiyadan AZƏRTAC-a bildirmişdir ki, kompleksin birinci mərhələsinin açılışından sonra belə müraciətlərin sayı artmışdır. Əsas müraciətlər Rusiya və MDB ölkələrindən alınır. Komplekslə bağlı hələlik güclü tanıtım kampaniyası başlamasa da, orada istirahət arzusunda olanların sayının çox olması sevindirici haldır.
Azərbaycanda fəaliyyət göstərən bütün turizm şirkətləri Şahdağ kompleksinə səfərlər təşkil edə bilərlər.
Şahdağ kompleksi Azərbaycan tarixində ilk dağ-xizək turizm mərkəzidir. Hazırda burada çalışacaq personalın hazırlanması ilə bağlı işlər aparılır. Bu məqsədlə təşkil edilmiş kurslara artıq 160 yerli mütəxəssis cəlb olunmuşdur.
Bölmənin digər xəbərləri
