Türkiyə Azərbaycan Dərnəkləri Federasiyası və İzmit bələdiyyəsi arasında əməkdaşlıq müzakirə olunmuşdur
Bakı, 15 aprel (AZƏRTAC). Türkiyə Azərbaycan Dərnəkləri Federasiyası (TADEF) idarə heyətinin üzvləri və Kocaeli Azərbaycan Mədəniyyət Evinin nümayəndələri 30 mart seçkilərində yenidən İzmit bələdiyyəsinin sədri seçilmiş Nevzat Doğanla görüşmüşlər.
Diasporla İş üzrə Dövlət Komitəsindən AZƏRTAC-a bildirilmişdir ki, TADEF-in rəhbəri Bilal Dündar görüşdə Azərbaycan ilə Türkiyə arasında bütün sahələrdə əməkdaşlığın gücləndirilməsinin önəmini qeyd etmişdir. O, İzmit bələdiyyəsinin həm TADEF-ə, həm də iki ölkə arasında münasibətlərin inkişafına verdiyi töhfələrin təqdirəlayiq olduğunu söyləmişdir.
Nevzat Doğan Türkiyə ilə Azərbaycan arasında dostluq və qardaşlıq münasibətlərinin daha da inkişaf etdirilməsi istiqamətində TADEF-in fəaliyyətini yüksək qiymətləndirmiş və təşkilatın bununla bağlı hər bir layihəsinə, gördüyü işlərə bundan sonra da dəstək verəcəklərini bildirmişdir. O, TADEF üçün ayrılmış tarixi binanın yaxın zamanda təşkilatın istifadəsinə veriləcəyini xatırlatmışdır.
Daha sonra qarşılıqlı əməkdaşlıqla bağlı bir sıra məsələlər, o cümlədən Kocaeli Universitetində təhsil alan azərbaycanlı tələbələrin bəzi problemlərinin həllinə dair fikir mübadiləsi aparılmışdır.
Bölmənin digər xəbərləri
