UKRAYNA DÖVLƏTİ KİYEVDƏKİ AZƏRBAYCAN MƏKTƏBİNİ YENİ BİNA İLƏ TƏMİN ETMİŞDİR
AZƏRTAC xəbər verir ki, Ukrayna hökuməti Kiyevdə fəaliyyət göstərən həftəsonu Azərbaycan məktəbini yeni bina ilə təmin etmişdir.
Xarici Ölkələrdə Yaşayan Azərbaycanlılarla İş üzrə Dövlət Komitəsindən bildirmişlər ki, Ukrayna Azərbaycanlıları Konqresinin təşkilatçılığı ilə 1999-cu ildə yaradılmış bu təhsil ocağı Kiyevin Qoloseyevski rayonundakı 37 nömrəli orta məktəbin binasında fəaliyyət göstərirdi.
Ukrayna dövləti bu məktəbdə dərs deyəcək müəllimlərə əmək haqqı da verəcəkdir. Bu barədə razılıq Ukrayna Prezidenti Viktor Yuşşenkonun Azərbaycana səfəri zamanı Prezident İlham Əliyevlə görüşündə əldə olunmuşdur. Məktəbdə ilk vaxtlar 25-dək şagird təhsil alacaqdır. Kiyevdə yaşayan digər xalqların nümayəndələri də burada Azərbaycan dilini, tarixini, mədəniyyətini öyrənə biləcəklər.
Məktəbi dərs vəsaitləri ilə Azərbaycan Respublikasının Təhsil Nazirliyi təmin edəcək, digər zəruri ləvazimatlar isə Ukrayna Azərbaycanlıları Konqresinin vəsaiti hesabına alınacaqdır.
Qeyd edək ki, Ukraynanın Xarkov şəhərində fəaliyyət göstərən Azərbaycan məktəbini şəhər rəhbərliyi 5 il əvvəl bina ilə təmin etmişdir. Burada çalışan müəllimlərə dövlət hesabına məvacib verilir.
Azərbaycan Təhsil Nazirliyinin göndərəcəyi dərs vəsaitlərinin bir hissəsi Xarkovdakı bazar günü məktəbinə veriləcəkdir. Eyni zamanda, Rabitə və İnformasiya Texnologiyaları Nazirliyi azərbaycanlı uşaqların təhsilinə yardım məqsədi ilə Ukrayna Azərbaycanlıları Konqresinə 2 dəst kompyuter hədiyyə etmişdir. Onlardan biri Kiyevdəki, digəri isə Xarkovdakı həftəsonu məktəblərində istifadə ediləcəkdir.
Bölmənin digər xəbərləri
