Vyanada Novruz bayramı qeyd olunmuşdur
Vyana, 21 mart (AZƏRTAC). Avstriyada fəaliyyət göstərən Azərbaycan Akademik Birliyinin təşkilatçılığı ilə Vyana şəhərində Novruz bayramı münasibətilə şənlik keçirilmişdir.
Azərbaycan Respublikası Gənclər və İdman Nazirliyinin dəstəyi ilə keçirilən tədbirdə Avstriyadakı Azərbaycan diasporunun nümayəndələri, səfirliyin əməkdaşları, bu ölkədə təhsil alan azərbaycanlı və əcnəbi tələbələr, Avstriya ictimaiyyətinin nümayəndələri, eləcə də Sloveniya, Slovakiya və digər Avropa ölkələrindən qonaqlar iştirak etmişlər.
Tədbirdə Azərbaycanın Avstriyadakı səfirliyinin birinci katibi Rövşən Mirzəxanlı, ARDNŞ-in Avstriyadakı nümayəndəliyinin direktoru Gülmirzə Cavadov, Azərbaycan Akademik Birliyinin idarə heyətinin üzvləri Murad Abışov və Bahadur İbrahimov çıxış etmiş, mərasim iştirakçılarını təbrik edərək, hamıya sağlam və firavan həyat, ruzi-bərəkətli günlər arzu etmişlər. Çıxış edənlər Avstriyada yaşayan həmyerlilərimizi Avstriyadakı ən böyük diaspor təşkilatımız olan Azərbaycan Akademik Birliyi ətrafında daha da sıx birləşməyə çağıraraq, onlara Azərbaycan haqqında həqiqətlərin yerli ictimaiyyətə çatdırılması işində uğurlar arzulamışdır.
Tədbirdə qonaqlar Azərbaycan mətbəxinin ləziz təamların dadına da baxmışlar.
Elgün Niftəliyev
AZƏRTAC-ın xüsusi müxbiri
Vyana
Bölmənin digər xəbərləri
