YENİYETMƏLƏRİN RESPUBLİKA OYUNLARI BAŞA ÇATMIŞDIR
Mayın 11-də start götürmüş Yeniyetmələrin 4-cü Respublika oyunlarının final yarışları keçirilmişdir. Gənclər, İdman və Turizm Nazirliyinin mətbuat xidmətindən AZƏRTAC-ın müxbirinə bildirmişlər ki, idmanın 16 növü üzrə yarışlarda 4 mindən çox gənc iştirak etmişdir. Ümumi hesabda şəhər komandaları arasında 2451 xal toplayan Bakının birinci yığması ən yaxşı kollektiv hesab edilmiş, ikinci yeri 2-ci Bakı komandası (1499 xal), üçüncü yeri isə sumqayıtlılar (1016 xal) tutmuşdur. Rayon komandaları arasında birinci yerə Masallı yığması (383,5 xal), ikinci yerə İsmayıllı (376,5 xal), üçüncü yerə isə Qusar komandaları (352,5 xal) çıxmışlar.
Mətbuat xidmətindən həmçinin bildirmişlər ki, qalib komandaların üzvlərindən MDB və Baltiya ölkələri yeniyetmələrinin beynəlxalq oyunlarında iştirak etmək üçün Azərbaycan yığma komandası təşkil olunacaqdır. Həmin oyunların 2005-ci ildə keçirilməsi nəzərdə tutulur.
Bölmənin digər xəbərləri
