REGİONLAR
Balakəndə tamburu yaşadan el sənətkarı FOTO VİDEO

Balakən, 6 iyun, AZƏRTAC
Bu yurdun təbiəti kimi insanları da mənəvi cəhətdən zəngindir, həmçinin adət-ənənələrinə sadiq, tarixi-mədəniyyətinə bağlıdır. Müxtəlif xalqların əsrlərdir birlik-bərabərlik şəraitində yaşadığı Balakənə hər yolu düşən bunu elə ilk andan hiss edə, görə bilər.
AZƏRTAC xəbər verir ki, Dədə Qorqud yadigarı tamburun yaşadılması və inkişaf etdirilməsi də mədəniyyətimizə, adət-ənənələrimizə bağlılıqdan irəli gəlir. Balakən sakini Nizami Dabaxov tamburu yaşadan, inkişaf etdirən bir el ozanı, el aşığıdır.
Folklor xalqların şifahi və yazılı ədəbiyyatını, adət-ənənələrini, ululardan miras qalan və qorunub saxlanılan inanclarını, musiqisini, xalq oyunlarını özündə birləşdirən, yaşadan və inkişaf etdirən mədəniyyətin bir qoludur. Balakən rayonunun kənd və qəsəbələrində folklor qrupları, el ozanları da bu sahəni yaşadır və inkişaf etdirir. Rayonda 30 ildən çoxdur ki, tamburu sinəsinə sıxıb söz qoşan, el-obanı, qəhrəmanlarımızı vəsf edən Nizami Dabaxov bu alətə nəinki sahib çıxıb, hətta yeniyetmə və gənclərdə tambura sevgi yaradıb.
İllərdir rayonda tambur ifaçısı kimi tanınan, respublika müsabiqələrinin iştirakçısı Nizami Dabaxov deyir ki, mədəniyyətimiz nə qədər inkişaf etsə belə, tambura sevgi qalacaq. Hətta gənclər, xüsusən son dövrlərdə qızlar tamburu öyrənməyə həvəs göstərir.
Nizami Dabaxov yeniyetmələrdən ibarət yeni folklor qrupu təşkil etdiyini və onlarla mütəmadi məşq etdiklərini bildirir. Folklor qrupunun üzvləri tamburda ifa edib, söz qoşmaqla yanaşı, həm də milli rəqslərə yeni üslub qatırlar.
Sənətşünaslıq üzrə fəlsəfə doktoru Şəfəq Hacıyeva uzun illərdir bu yurdun folklorunu öyrənib-araşdırmaqla məşğuldur. O, Nizami Dabaxovla Balakəni qarış-qarış gəzib, həm bu el sənətkarının bəstə və ifalarını araşdırıb, həm də yaradıcı gəncləri Nizami məktəbinə cəlb edib. Mədəniyyətimizin təbliği və inkişaf yolunda yorulmadan çalışan bu kollektivin üzvləri tez-tez bir araya gəlib, həm yeni qrupun formalaşması istiqamətində məşqlər edir, həm də yeni bayatılar üzərində kompozisiyalar qururlar. Məqsəd Dədə Qorqud yadigarı olan tamburu balakənli Nizami Dabaxovun simasında bölgə və respublika miqyaslı festival və sərgilərdə tanıtmaq, sevdirməkdir.