Anar Bağırov: Prezidentin Əfv Sərəncamını imzalaması Heydər Əliyevin humanist siyasətinin davamıdır
Əfv Sərəncamının imzalanması Ulu Öndərin əziz xatirəsinə dərin hörmət və ehtiramın ifadəsidir
Bakı, 9 may, AZƏRTAC
Prezident İlham Əliyev tərəfindən müstəqillik tarixinin ən böyük Əfv Sərəncamının imzalanması Heydər Əliyevin humanist siyasətinin davamıdır.
Bunu AZƏRTAC-a müsahibəsində Vəkillər Kollegiyasının sədri Anar Bağırov deyib. O qeyd edib ki, Azərbaycan dövlət müstəqilliyini bərpa etdikdən sonra ölkədə həyata keçirilən kompleks islahatların mərkəzində məhz Ümummilli Lider Heydər Əliyev dühası dayanır. Dövlət müstəqilliyimizin əbədi, sarsılmaz və dönməz olması Heydər Əliyevin adı ilə bağlıdır.
Ulu Öndərin rəhbərliyi ilə hazırlanaraq 1995-ci ildə referendumla qəbul edilən Konstitusiyamızda əsas insan hüquqları və azadlıqları təsbit olunub, onların müdafiəsi, vətəndaş hüquq və azadlıqlarının yüksək səviyyədə qorunması, həmçinin humanizm siyasətinin həyata keçirilməsində mütərəqqi və ardıcıl addımlar atılıb.
Anar Bağırov deyib ki, Ümummilli Liderin hakimiyyəti illərində humanizm prinsipini rəhbər tutaraq çoxsaylı əfv sərəncamlarının qəbulu və ya amnistiyanın tətbiq edilməsi artıq ənənəyə çevrilib. Bu ənənəni davam etdirən Prezident İlham Əliyevin “Məhkum edilmiş bir sıra şəxslərin Azərbaycan xalqının Ümummilli Lideri Heydər Əliyevin 100 illik yubileyi münasibətilə əfv olunması haqqında” 2023-cü il 8 may tarixli Sərəncamına əsasən 801 məhkum əfv olunub, onlardan 463 şəxs azadlıqdan məhrumetmə cəzasından, 220 şəxs azadlıqdan məhrumetmə cəzasının çəkilməmiş hissəsinin yarısından, 118 nəfər azadlıqdan məhrumetmə ilə bağlı olmayan digər cəzalardan (azadlığın məhdudlaşdırılması, islah işləri, cərimə cəzaları və cəzaya şərti məhkum edilmiş şəxslər) azad edilib.
“Bu Əfv Sərəncamının imzalanması dahi şəxsiyyət Heydər Əliyevin layiqli davamçısı Prezdent İlham Əliyev tərəfindən humanizm, mərhəmət və insanpərvərlik ənənələrini rəhbər tutmaqla Ulu Öndərin əziz xatirəsinə dərin hörmət və ehtiramın ifadəsidir.
Eyni zamanda vurğulanmalıdır ki, Azərbaycanın Birinci vitse-prezidenti Mehriban Əliyevanın təşəbbüsü ilə bundan əvvəl ölkəmizdə bir neçə dəfə amnistiya aktları qəbul edilib. Nəticədə, minlərlə insan azadlığa qovuşub, onların qayıtmasını həsrət və intizarla gözləyən övladlarının və valideynlərinin hədsiz sevincinə səbəb olub.
Prezident İlham Əliyev tərəfindən belə humanist addım atılması dövlətin əfv olunmuş şəxslərə inamının ən bariz göstəricisidir”, - deyə Vəkillər Kollegiyasının sədri vurğulayıb.
Bölmənin digər xəbərləri
