Azərbaycan-BƏƏ əməkdaşlığı qlobal platformaya çevrilir- Ekspert rəyi
Bakı, 19 dekabr, AZƏRTAC
Birləşmiş Ərəb Əmirlikləri (BƏƏ) Yaxın Şərqin aparıcı iqtisadi mərkəzi, Azərbaycan isə Cənubi Qafqazın lider dövləti kimi qlobal miqyasda strateji əhəmiyyətə malikdirlər. Bu kontekstdə yanaşsaq, rəsmi Bakı ilə Əbu-Dabi arasında sıx təmasların qurulması, dostluq, müttəfiqlik münasibətinin yaradılması qarşılıqlı maraqları təmin etməklə yanaşı, həm də qlobal əhəmiyyət kəsb edir. Azərbaycan Prezidenti İlham Əliyevin Birləşmiş Ərəb Əmirliklərinin rəhbəri Şeyx Məhəmməd bin Zayed Al Nəhyanın dəvəti ilə dekabrın 17-də Əbu-Dabiyə səfər etməsi dövlətlərimiz arasında əməkdaşlığın yüksələn xətlə inkişaf etdiyini bir daha təsdiqləyir.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
O bildirib ki, səfərin diqqətçəkən məqamlarından biri də Prezident İlham Əliyevin Əbu-Dabidə keçirilən “Gələcəyin Oyunları 2025” adlı qlobal idman turnirinin açılış mərasimində iştirak etməsidir. Fiziki idman növləri ilə rəqəmsal oyunları birləşdirən bu turnir, gələcəyin idman konsepsiyasının eskizidir. BƏƏ Prezidentinin dövlətimizin başçısına bu tədbirdə iştirakına görə minnətdarlıq bildirməsi isə Azərbaycanın beynəlxalq idman, innovasiya və rəqəmsal transformasiya təşəbbüslərinə verdiyi dəstəyin göstəricisidir.
“Prezident İlham Əliyevin Birləşmiş Ərəb Əmirliklərinə indiki səfəri dövlətlərimiz arasında əməkdaşlığın çoxşaxəli, geniş spektrlər üzrə qurulduğunu nümayiş etdirir. Bu əməkdaşlıq idman, mədəniyyət, turizm sahələrindən başlamış iqtisadi, siyasi və strateji tərəfdaşlığa qədər ən müxtəlif sahələri əhatə edir. İlkin əlaqələr daha çox iqtisadi təmayüllü olub, enerji layihələri üzərində fokuslaşmışdı. BƏƏ şirkətləri Azərbaycanda Günəş və külək elektrik stansiyalarının inşasına cəlb edilərək, Azərbaycanın qeyri-neft sektoruna sərmayə yatıran əsas tərəfdaşlardan birinə çevrilmişdi. İndiki əməkdaşlıq isə turizm, logistika, kənd təsərrüfatı, infrastruktur, enerji layihələrindən başlamış, siyasi münasibətlərdə tərəfdaşlığa qədər inkişaf edib. Azərbaycan Ermənistanla vasitəçisiz sülh danışıqlarını ilk dəfə məhz Əbu-Dabidə keçirməyə razılıq verməklə BƏƏ-yə olan etimadını nümayiş etdirib. BƏƏ-nin Azərbaycanın ərazi bütövlüyünə verdiyi açıq dəstək və konstruktiv mövqeyi münasibətlərin strateji xarakter daşıdığını təsdiqləyir”, - deyə M.Ələsgərli vurğulayıb.
Ekspert əlavə edib ki, hazırda Azərbaycan və BƏƏ beynəlxalq təşkilatlar çərçivəsində bir-birini fəal şəkildə dəstəkləyirlər. İslam Əməkdaşlıq Təşkilatı, BMT və Qoşulmama Hərəkatı daxilində koordinasiya, eləcə də iqlim gündəliyi üzrə əməkdaşlıq bunun bariz nümunəsidir. Bütün bunlara istinad edərək, deyə bilərik ki, Prezident İlham Əliyevin Əbu-Dabiyə səfəri Azərbaycan–BƏƏ münasibətlərinin yalnız mövcud səviyyəsini deyil, həm də gələcək inkişaf perspektivlərini aydın şəkildə ortaya qoyur. Qarşılıqlı maraqlara əsaslanan bu tərəfdaşlıq hər iki ölkəyə siyasi nüfuz, iqtisadi fayda və regional sabitlik baxımından mühüm dividendlər gətirir.
Bölmənin digər xəbərləri
