Azərbaycan səfiri etimadnaməsinin surətini Ukrayna XİN-ə təqdim edib
Kiyev, 10 iyun, AZƏRTAC
İyunun 9-da Ukrayna xarici işlər nazirinin müavini Yevgeni Perebiynis Azərbaycanın bu ölkəyə yeni təyin olunmuş səfiri Seymur Mərdəliyevin etimadnaməsinin surətini qəbul edib.
Ukrayna Xarici İşlər Nazirliyindən AZƏRTAC-a bildiriblər ki, nazir müavini son vaxtlar ikitərəfli siyasi dialoqun intensivləşməsini müsbət qiymətləndirib və Rusiyanın təcavüzünə qarşı mübarizədə Azərbaycanın Ukraynaya gələcək dəstəyinə ümid etdiyini bildirib, xüsusən də Azərbaycan tərəfini Ukrayna Prezidenti Volodimir Zelenskinin Sülh Formulasına qoşulmağa çağırıb.
Yevgeni Perebiynis göstərilən humanitar yardıma, o cümlədən Ukrayna vətəndaşlarının Azərbaycanda reabilitasiyasına və hərbi əməliyyatlar nəticəsində zərər çəkmiş uşaqların istirahətinin təşkilinə dair qərara görə ölkəmizə təşəkkür edib.
Seymur Mərdəliyev öz növbəsində Kaxovka SES-də baş verən partlayışın nəticələrinin aradan qaldırılması üçün Azərbaycan tərəfindən Ukraynaya əlavə humanitar yardımın göndərilməsi barədə məlumat verib. Səfir, həmçinin Azərbaycanın Ukraynanın suverenliyi və ərazi bütövlüyünə davamlı dəstəyinə əminliyini bildirib. Kiyev və Bakı arasında əməkdaşlığı gücləndirməyə hazır olduğunu vurğulayıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
