Azərbaycanın BƏƏ ilə münasibətlərinin inkişafı beynəlxalq mövqelərimizi möhkəmləndirir ŞƏRH
Bakı, 19 sentyabr, AZƏRTAC
Azərbaycanın Birləşmiş Ərəb Əmirlikləri (BƏƏ) ilə münasibətləri özünün inkişaf dövrünü yaşayır. Ölkələrimiz arasındakı əlaqələr dostluq və əməkdaşlıq xarakteri daşıyır və son illərdə müxtəlif sahələrdə əhəmiyyətli irəliləyiş əldə edib. Hər iki ölkənin dövlət başçıları arasındakı dostluq münasibətləri ölkələrimiz arasındakı əməkdaşlığın inkişafına impuls verir. Belə ki, son illər dövlət başçılarının qarşılıqlı səfərləri və imzalanmış sənədlər ikitərəfli münasibətlərdə yeni səhifə açıb.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
O bildirib ki, BƏƏ Prezidenti Şeyx Məhəmməd bin Zayed Al Nəhyanın Şuşaya səfəri və bu səfər çərçivəsində imzalanmış 14 sənəd, o cümlədən hərtərəfli strateji tərəfdaşlığın genişləndirilməsinə dair saziş, əməkdaşlığımızın daha da dərinləşməsi üçün yeni imkanlar yaradır. Bu münasibətlər həm siyasi, həm iqtisadi, həm də mədəni sahələri əhatə edir.
“Azərbaycan və BƏƏ arasında diplomatik münasibətlər 1992-ci ildə qurulub. Siyasi münasibətlər qarşılıqlı hörmət və etimad əsasında gündən-günə möhkəmlənir. Hər iki ölkə beynəlxalq platformalarda bir-birini dəstəkləyir. Torpaqlarımızın vaxtilə işğal altında olduğu dövrdə BƏƏ Azərbaycanın ərazi bütövlüyünü dəstəkləyib və münaqişənin beynəlxalq hüququn normaları çərçivəsində həllini müdafiə edib. O cümlədən ərazilərimizdə suverenliyin bərpasına görə sevinən BƏƏ Azərbaycanla qardaş və dost ölkə olduğunu bir daha nümayiş etdirib.
Azərbaycanla BƏƏ arasındakı iqtisadi münasibətlər qarşılıqlı fayda və hörmətə əsaslanır. Son bir ildə ölkələrimiz arasında neft sektoru üzrə ticarət dövriyyəsi təxminən 2,5 milyard dollara yaxınlaşıb ki, bu da iqtisadi əlaqələrin inkişafının göstəricisidir. BƏƏ Azərbaycan iqtisadiyyatına ən çox investisiya qoyan ölkələr arasında 5-ci yerdədir. ADNOC şirkəti Xəzər dənizində qaz yataqlarının işlənməsində, “Masdar” şirkəti isə bərpaolunan enerji sektorunda böyük investisiyalar həyata keçirir. Son illərdə qurulan Günəş və külək elektrik stansiyaları enerji sektorunun gücünü artırmaqda mühüm rol oynayıb”, - deyə A.Badamov vurğulayıb.
Deputat əlavə edib ki, qeyri-neft sektorunda əməkdaşlığın genişləndirilməsi də qarşılıqlı maraq doğurur. Ölkəmizə BƏƏ-dən gələn turistlərin sayı artmaqdadır, bu da turizm sektorunun inkişafına töhfə verir. "Bakı Gəmiqayırma Zavodu" ilə "Əbu-Dabi Limanları Şirkəti" arasında iki ədəd konteyner gəmisinin tikintisinə və satışına dair müqavilə imzalanıb. Həmçinin Azərbaycanda istehsal olunan aqrar məhsulların BƏƏ bazarına çıxarılması imkanları nəzərdən keçirilir. Mədəniyyətlərarası əməkdaşlığın genişləndirilməsi istiqamətində də müvafiq addımlar atılır.
BƏƏ Prezidentinin Şuşaya səfəri böyük siyasi əhəmiyyət daşıyır. Bu, Azərbaycanın qardaş və dost ölkə ilə əlaqələrini bütün dünyaya nümayiş etdirir. Ölkələrimiz arasındakı münasibətlərin inkişafı beynəlxalq mövqelərimizi möhkəmləndirir və sözümüzün gücünü artırır.
Bölmənin digər xəbərləri
