Bakı, 30 sentyabr (AZƏRTAC). “Azərenerji” ASC-nin paylayıcı elektrik şəbəkələrinin balansında olan texniki vasitələrin istismar səviyyəsinin daha da yüksəldilməsi məqsədilə zəruri tədbirlər görülür. Bu tədbirlər planına Bərdə rayonunun 10-0,4 kilovoltluq (kV) elektrik verilişi xətləri və transformator məntəqələri də daxıldır.

“Azərenerji” ASC-nin mətbuat xidmətindən AZƏRTAC-a bildiriblər ki, rayonda mövcud avadanlıq və xətlərin istismar səviyyəsinin yüksəldilməsi hazırda diqqət mərkəzindədir. Son iki ayda “Bərdə” Elektrik Şəbəkəsi Müəssisəsi üzrə əsaslı və cari təmir işləri görülüb. Yeni mənzil sahiblərinin ünvanına 90-dan artıq sayğac quraşdırılıb, 170-dək zədələnmiş sayğac dəyişdirilib. Elektrik enerjisindən qeyri-qanuni istifadə hallarının vaxtında aşkar edilməsi üçün reydlər keçirilir.