BRÜSSELDƏ XOCALI FACİƏSİNİN 18-Cİ İLDÖNÜMÜ GENİŞ QEYD OLUNMUŞDUR
Brüssel, 28 fevral (AZƏRTAC). Azərbaycanın Belçika Krallığında və Lüksenburq Hersoqluğundakı səfirliyindən bildirmişlər ki, fevralın 26-da səfirliK, ölkəmizin Avropa İttifaqı və NATO yanında nümayəndəlikləri tərəfindən Xocalı soyqırımı ilə əlaqədar Brüsselin Beynəlxalq Mətbuat Mərkəzində seminar keçirilmişdir.
Xocalı soyqırımı qurbanlarının xatirəsi bir dəqiqəlik sükutla yad edilmişdir. Səfir Emin Eyyubov 18 il öncə erməni terrorçularının Xocalıda törətdiyi faciə haqqında məlumat vermiş və bu soyqırımın dünyada tanınması və haqq-ədalətin öz yerini tapması üçün İslam Konfransı Təşkilatının Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə elan olunmuş “Xocalıya ədalət” beynəlxalq kampaniyasının mühüm rolundan danışmışdır. O, Belçikadakı Azərbaycan diaspor təşkilatlarının da bu aksiyaya qoşulduğunu və müvafiq tədbirlər gördüyünü qeyd etmişdir.
Azərbaycanın NATO yanında nümayəndəliyinin rəhbəri Kamil Xasıyev Xocalı faciəsinin ermənilərin insanlığa qarşı törətdiyi ən amansız cinayətlərdən biri olduğunu qeyd etmiş və dünya ictimaiyyətinin buna layiqli qiymət verməsinin vacibliyini vurğulamışdır.
Brüsseldə fəaliyyət göstərən Azərbaycan Kommunukasiya ofisinin rəhbəri Müslüm Məmmədov “Justice for Khojaly” internet səhifəsini iştirakçılara təqdim etmiş və “Xocalıya ədalət” beynəlxalq kampaniyası barədə geniş məlumat vermişdir. Tədbir zamanı qonaqlar “Justice for Khojaly” klipinə baxmışlar.
Seminardan sonra iştirakçılar Heydər Əliyev Fondu və “Xocalıya ədalət” beynəlxalq kampaniyası tərəfindən hazırlanmış foto-sərgiyə baxmış və müvafiq təbliğat materialları ilə tanış olmuşlar. İştirakçılar “Xocalıya ədalət” beynəlxalq kampaniyası çərçivəsində hazırlanmış və dünya liderlərinə ünvanlanmış petisiyaya imza atmışlar.
Tədbirdə Belçika ictimaiyyətinin nümayəndələri, xarici ölkələrin səfirləri və diplomatlar, QHT-lərin təmsilçiləri, Azərbaycan diasporunun üzvləri və bu ölkədə təhsil alan tələbələrimiz iştirak etmişlər.
Bundan əlavə, səfirlik tərəfindən hazırlanmış xüsusi mətbuat açıqlaması, Belçikanın rəsmi qurumlarına, diplomatik nümayəndəliklər, QHT və KİV-lərə göndərilmiş, səfirliyin internet səhifəsində yerləşdirilmişdir.
Azərbaycan-Belçika Dostluq Cəmiyyəti və Dünya Azərbaycanlılar Birliyi də öz növbəsində Brüsseldə Avropa İttifaqı təsisatlarının qarşısında yürüş-mitinq keçirmişlər. Azərbaycan bayraqlarının dalğalandığı yürüş-mitinq zamanı ermənilərin törətdiyi vəhşiliklər pislənmiş və cinayətkarların cəzalandırılması tələb edilmiş, ”Xocalıya ədalət” şüarları səsləndirilmiş, Ermənistandan işğal etdiyi Azərbaycan torpaqlarından çəkilməsi və dünya ictimaiyyətinin bu hadisələrə göz yummaması tələb edilmişdir. Yürüş-mitinqə qatılmış Azərbaycan və Türk diaspor təşkilatları rəhbərlərinin imzaladığı “Xocalıya ədalət” kampaniyasına qoşulmağa dair məktublar, Avropa İttifaqı qurumlarının təmsilçilərinə və Azərbaycan torpaqlarını azad etməsi və Xocalı soyqırımını etiraf etməsinə çağırışla bağlı Ermənistan hökumətinə ünvanlanmış məktub isə həmin ölkənin səfirliyinə təqdim edilmişdir.
Yürüş-mitinq zamanı iştirakçılar “Xocalıya ədalət” beynəlxalq kampaniyasının hazırladığı köynəkləri geymiş, materiallardan istifadə etmiş, müvafiq bröşürləri Brüssel sakinlərinə paylamış və dünya liderlərinə ünvanlanmış petisiyaya imza atmışlar.
Diaspor təşkilatları Avropa Parlamentinin üzvlərinə, Belçikanın senatorlarına və millət vəkillərinə “Xocalıya ədalət” beynəlxalq kampaniyasına qoşulmalarına, Xocalı soyqırımını tanımalarına və ona hüquqi-siyasi qiymətin verilməsi prosesində iştirak etməyə dəvətlə bağlı məktublar ünvanlamışlar.
Həmin gün Brüsseldə yerləşən Fatih məscidində cümə namazı zamanı Xocalı soyqırımı qurbanlarının ruhuna dualar da oxunmuşdur.
Əsgər Əliyev,
AZƏRTAC-ın xüsusi müxbiri.
Brüssel
Bölmənin digər xəbərləri
