CAVAD XANIN KÖTÜKCƏSİ UZAQ MALAYZİYADA İNSANLARA ŞƏFA VERİR
Bakı, 16 aprel (AZƏRTAC). Azərbaycanın Malayziyadakı səfirliyindən agentliyə maraqlı bir məlumat daxil olmuşdu. Həmin məlumatda bildirilirdi ki, Asiyanın bu uzaq ölkəsində azərbaycanlı neyrocərrah işləyir və o, məşhur Cavad xanın kötükcəsidir.
Təbii ki, bu maraqlı xəbərə görə səfirliyə minnətdarlığımızı bildirdik və xalqımızın görkəmli oğlunun nəslinin nümayəndəsi haqqında mümkün qədər ətraflı məlumat almaq istədik. Səfir Tahir Kərimov xahişimizə çox diqqətlə yanaşdı və bu günlərdə cavab aldıq.
Səfirliyimizin əməkdaşları Kazım Cavadxaniyə zəng edəndə o, cərrahiyyə əməliyyatında imiş. Sonradan özü zəng edir. Diplomatlarımızın onu axtarıb-aramasından son dərəcə təsirlənən soydaşımız, ilk növbədə, Malayziyada Azərbaycanın səfirliyinin açılmasından çox sevindiyini demişdir. Daha sonra o, Azərbaycanda ulu babası Cavad xan haqqında film çəkilməsi barədə xəbəri olduğunu bildirmiş və onun nə vaxt hazır olacağı ilə maraqlanmışdır...
Gəncə xanlığı çar Rusiyası tərəfindən işğal olunduqdan sonra Cavad xanın nəslinin sağ qalmış nümayəndələri Təbrizə köçmüş, orada Cavadxani soyadı ilə yaşamışlar. Kazım Cavadxani də 1947-ci il martın 24-də Təbrizdə doğulmuşdur. Burada universiteti bitirmiş, 1976-82-ci illərdə Belcikanın Lüven Katolik Universitetində neyrocərrahlıq ixtisasına yiyələnmişdir. K.Cavadxani 1982-ci ildə Malayziyaya gəlmiş, paytaxt Kuala-Lumpurdakı Milli Universitetin tibb fakültəsində neyrocərrahlıqdan mühazirələr oxumuşdur. Sonra isə on il ərzində Penanq ştatında neyrocərrah-məsləhətçi işləmişdir. 1996-cı ildən həmin ştatda özəl klinikada neyrocərrah-məsləhətçidir.
Kazım Cavadxani bu uzaq ölkədə yüksək səviyyəli mütəxəssis kimi tanınmışdır. Fəxrlə demək olar ki, Malayziyada ilk neyrocərahiyyə əməliyyatı da onun adı ilə bağlıdır.
Soydaşımızın xanımı da azərbaycanlıdır. Onların iki oğlu və bir qızı var.
Kazımın qardaşı Rza hazırda ABŞ-ın Virciniya ştatında yaşayır. Rza Cavavdxani İndiki Diaspor ilə İş üzrə Dövlət Komitəsinin dəvəti ilə 2007-ci ildə Azərbaycana gəlmiş və o vaxt ona fəxri vətəndaşlıq verilmişdir.
Bölmənin digər xəbərləri
