COP-27 iqlim sammitində qlobal ərzaq böhranı müzakirə olunub
Qahirə, 13 noyabr, AZƏRTAC
Misirin Şarm əl-Şeyx şəhərində keçirilən COP27 iqlim sammitinin yeddinci günündə dünyadakı 8 milyard insanın ərzaq təminatı məsələləri müzakirə olunub. Bu kontekstdə irəli sürülən təşəbbüslər uyğunlaşma və iqlim dəyişikliyinə davamlı kənd təsərrüfatı üzrə irəliləyiş yollarına işıq salıb.
AZƏRTAC xəbər verir ki, ərzaq məsələləri ilə bağlı təşkil olunan sessiyalarda Davamlı Transformasiya üçün Ərzaq və Kənd Təsərrüfatı (FAST), Dayanıqlı Sülh naminə İqlim Cavabları (CRSP), İqlimə Dayanıqlı Afrika üçün Layiqli Həyat və İqlim Fəaliyyəti və Qidalanma Təşəbbüsü (I-CAN) təşəbbüsləri irəli sürülüb. Əsas diqqət Afrikanın Buynuz regionunda 37 milyon insanın aclıqla üzləşməsi probleminə yönəldilib.
Bununla yanaşı, Pakistanda misli görünməmiş daşqınların ölkənin əsas kənd təsərrüfatı bölgələrinə vurduğu ziyan, Avropa və ABŞ-da rekord həddə istilik dərəcəsinin məhsuldarlığı kəskin azaltması ilə əlaqədar növbəti ilin ərzaq təhlükəsizliyi baxımından ağır olacağı qeyd edilib. Çıxışlarda vurğulanıb ki, Rusiyanın Ukraynadakı müharibəsi buğdada, yağlı toxumlarda və gübrədə qlobal qıtlığa və qiymət artımlarına səbəb olub, yanacaq qiymətlərinin sürətlə qalxması isə qida sənayesini daha da kövrək hala salıb.
COP-27-nin prezidenti Sami Şükrü öz çıxışında deyib: “Əhali artımı fonunda qida sistemlərimiz bütün dünyadakı icmaları inklüziv, məsuliyyətli və davamlı şəkildə istehsal olunan qida ilə təmin etmək üçün çalışmalıdır. Hər il 43 milyon insan aclıqdan əziyyət çəkir və bu, bəşəriyyətin qarşısında duran ən vacib problemlərdən biridir. Bu baxımdan yeni təşəbbüslər geosiyasi dəyişikliklərin və ekstremal hava hadisələrinin dünyanın ən yoxsul təbəqələrinə zərər vuran, aclıq və qida çatışmazlığını daha da gücləndirən qida tədarük zəncirlərinin kütləvi şəkildə pozulmasına səbəb ola biləcəyi müasir dünyada çox mühümdür”.
Tədbirdə ekspertlər və nazirlər səviyyəsində ən müasir texnologiyalara, o cümlədən süni intellektə investisiyaların artırılması yolu ilə iqlim dəyişikliyinin aclıq və qidalanmaya mənfi təsirinə son qoyulması, erkən xəbərdarlıq sistemlərinin təkmilləşməsi, təbii fəlakətlərin kənd təsərrüfatına vurduğu ziyanın minimuma endirilməsi ətrafında fikir mübadiləsi aparılıb.
AZƏRTAC-ın xüsusi müxbiri
Qahirə
Bölmənin digər xəbərləri
