Dövlət Bayrağı Günü Naxçıvanın Bakıdakı daimi nümayəndəliyində qeyd edilib
Bakı, 8 noyabr, AZƏRTAC
Noyabrın 8-də Naxçıvan Muxtar Respublikasının Bakı şəhərindəki daimi nümayəndəliyində Dövlət Bayrağı Günü ilə əlaqədar tədbir keçirilib. Bu barədə AZƏRTAC-a daimi nümayəndəlikdən məlumat veriblər.
Tədbirdə çıxış edən daimi nümayəndəliyin rəhbəri Bəxtiyar Əsgərov dövlət rəmzlərinə, dövlətçilik ənənələrinə hörmət və sədaqət hissinin gücləndirilməsi, Azərbaycanın milli mədəni irsi və tarixi haqqında məlumatlandırılması, Azərbaycanın dövlət rəmzləri haqqında biliklərin möhkəmləndirilməsinə yönələn fikirlər səsləndirib. Qeyd edib ki, üçrəngli bayrağımız 1918-ci il noyabrın 9-da Azərbaycan Xalq Cümhuriyyəti dövründə ilk dəfə qaldırılıb və 23 aydan sonra daxili çəkişmələr və xarici müdaxilə ilə zorla endirilib. Daha sonra bu bayraq uzun illər qadağan edilib, məhz 1990-cı il noyabr ayının 17-də ulu öndər Heydər Əliyevin təşəbbüsü ilə Naxçıvan Muxtar Respublikası Ali Məclisində yenidən dövlət bayrağı kimi qəbul olunub.
Bəxtiyar Əsgərov bildirib ki, bu bayraq Azərbaycan xalqının vicdan və qeyrət, namus rəmzinə çevrilib. Xalqımız ümummilli liderimiz Heydər Əliyevin rəhbərliyi ilə bu bayraq altında sıx birləşmiş, onu daha uca zirvələrə qaldırmış, müqəddəslik və şərəf rəmzi kimi üçrəngli bayrağımızın əbədi dalğalanmasına zəmin yaratmışdır. Bəxtiyar Əsgərov vurğulayıb ki, Prezident İlham Əliyevin 2009-cu ildə imzaladığı Sərəncamla 9 noyabr tarixinin Dövlət Bayrağı Günü və Naxçıvan Muxtar Respublikası Ali Məclisinin sədri Vasif Talıbovun 2014-cü ildə imzaladığı müvafiq sərəncamla 17 noyabr tarixinin Naxçıvan Muxtar Respublikasında Dövlət Bayrağı Günün kimi qeyd edilməsi milli bayrağımıza dövlət qayğısının əməli təzahürü kimi qiymətləndirilməlidir. Prezident İlham Əliyevin rəhbərliyi ilə Respublikamızın paytaxtı Bakı şəhərində Bayraq Meydanı tikilib, ətrafında Bayraq Muzeyi yaradılıb. Bunlar sadəcə bir hadisə deyil, xalqımızın hünər, müstəqillik əzmi və mübarizə ruhunu ifadə edən dövlət simvoluna hörmətin bariz ifadəsidir.
1995-ci il noyabrın 12-də Azərbaycan xalqı referendum yolu ilə öz dövlətinin əsas Qanununu - dahi Heydər Əliyevin müəllifi olduğu Konstitusiyanı qəbul edib. Bu Konstitusiya müstəqilliyini bərpa etmiş Azərbaycan dövlətinin ilk milli konstitusiyası kimi tarixə düşüb. Yeni Konstitusiya ölkədə demokratik, hüquqi, dünyəvi və unitar dövlət qurulması işinə hüquqi zəmin yaradıb. “Əsas Qanunda Azərbaycanımızın dövlət müstəqilliyini, suverenliyi və ərazi bütövlüyünü qorumaq, cəmiyyətin demokratikləşdirilməsinə və vətəndaş cəmiyyətinin bərqərar olunmasına nail olmaq, qanunların aliliyini təmin edən hüquqi, dünyəvi dövlət qurmaq, bazar iqtisadiyyatına xas olan münasibətlərin formalaşmasını təmin etmək kimi nailiyyətlər təsbit olunmuşdur”, - deyə nümayəndəliyin rəhbəri vurğulayıb.
Bəxtiyar Əsgərov bildirib ki, bir neçə dəfə referendum yolu ilə dəyişiklik edilmiş Konstitusiyamızın zaman keçdikcə, nə qədər güclü, kamil və həyati sənəd olduğu təsdiqlənib və o, demokratik sənəd kimi özünü doğruldub. Möhkəm bünövrə üzərində ucalan dövlətçiliyimiz demokratik mahiyyəti ilə ümumdünya dəyərlərinə söykənərək, xalqımızın öz həqiqətlərinin dünyaya bəyan etməsinə imkan qazandırıb.
Bəxtiyar Əsgərov bir daha qeyd edib ki, ümummilli lider Heydər Əliyev tərəfindən ilk dəfə Naxçıvan Muxtar Respublikasında 1990-cı il noyabrın 17-də Azərbaycan Xalq Cümhuriyyətinin üçrəngli bayrağı muxtar respublikanın Dövlət Bayrağı kimi rəsmən təsdiq edilib. Ulu Öndərimizə böyük ehtiramın və onun işıqlı yoluna sədaqətin növbəti nümunəsi kimi, Naxçıvan Muxtar Respublikası Ali Məclisi sədri Vasif Talıbov “Naxçıvan Muxtar Respublikasının Dövlət Bayrağı haqqında” 2014-cü il noyabrın 17-də imzaladığı Sərəncama əsasən, hər il noyabrın 17-si qədim diyarda Naxçıvan Muxtar Respublikasının Dövlət Bayrağı Günü kimi qeyd edilir. Eyni zamanda, qeyd olunub ki, Naxçıvan Muxtar Respublikası Ali Məclisinin Sədri Vasif Talıbovun 2014-cü il avqustun 22-də imzaladığı Sərəncama əsasən 2014-cü il noyabrın 17-də Naxçıvan şəhərində Dövlət Bayrağı Meydanı və Muzeyi istifadəyə verilib.
Tədbir digər çıxışlarla davam etdirilib.
Bölmənin digər xəbərləri
