SİYASƏT
Ərdoğanın rəhbərliyi dövründə Türkiyə dünya miqyasında söz sahibinə çevrilib
Bakı, 6 aprel, AZƏRTAC
Türkiyə kifayət qədər dinamik inkişaf edən bir ölkədir. Əvvəllər qardaş ölkə əsasən müxtəlif təyinatlı məsulları idxal edirdi. Hazırkı dövrdə isə Türkiyə dünyanın ən iri ixracatçı dövlətinə çevrilib. Türkiyə belə böyük inkişaf yolunu məhz Prezident Rəcəb Tayyib Ərdoğanın rəhbərliyi dövründə keçdi.
Bunu AZƏRTAC-a açıqlamasında Milli Məclisin deputatı, Yeni Azərbaycan Partiyasının İdarə Heyətinin üzvü Elşad Mirbəşiroğlu deyib.
Qardaş Türkiyədə istehsal olunan ən müxtəlif təyinatlı məhsullarının dünyanın fərqli bazarlarına ixrac edildiyini diqqətə çatdıran deputat qeyd edib ki, bu reallıq Türkiyənin tam müstəqil siyasət yeritməsi, təhlükəsizliyinin daha səmərəli təmin olunması baxımından olduqca əhəmiyyətlidir. Məsələn, Türkiyə ilk dəfə olaraq milli avtomobilinin istehsalına başladı. Avtomobil istehsalı sənayesinin inkişafı Türkiyə milli iqtisadiyyatının və ümumiyyətlə, ölkədə sosial-iqtisadi rifahın yüksəlməsində çox təsirli rol oynayacaq. Birincisi, Türkiyə öz milli markasını dünya bazarına təqdim etməklə, ticarət predmetini yaratmış olur. Bu da öz növbəsində ölkəyə yeni maliyyə axını kanalını təmin edəcək. İkincisi, Türkiyə avtomobil bazarının tam ixracdan asılılığını əhəmiyyətli dərəcədə zəiflədəcək. Bununla da, ölkə iqtisadiyyatına kənar təsir imkanları da məhdudlaşacaq. Üçüncüsü, yeni istehsal sahəsi yeni iş yerləri deməkdir. Qardaş ölkədə əhalinin məşğulluğunun təmin olunmasının yeni sahəsi meydana gəlmiş oldu. Həqiqətən də, Türkiyə son dövrlərdə kifayət qədər geniş çeşidli texniki sənaye məhsulları istehsal etməyi bacarıb və Türkiyə istehsalı olan məhsullar dünya bazarında yaxşı nüfuza malikdirlər. Yəni, bu məhsullara yüksək tələbatın olduğu müşahidə edilir.
“Azərbaycan Respublikasının Prezidenti İlham Əliyevin də dediyi kimi, R.T.Ərdoğanın liderliyi ilə Türkiyənin elmi-sənaye potensialı yüksəlməkdədir. Togg avtomobilinin kütləvi istehsalının başlanması da buna bariz nümunədir. Türkiyə Prezidentinin bildirdiyi kimi, ilkin mərhələdə ildə 175 min avtomobil istehsal olunacaq, sonrakı dövrlərdə isə istehsal gücü bir milyona qədər artırılacaq. Türkiyənin milli avtomobil markasının yaradılması ölkə sənayesinin yüksək inkişaf səviyyəsinin bariz göstəricisidir. Diqqəti cəlb edən mühüm məqamlardan biri də ondan ibarətdir ki, ilk Togg sahibi Türkiyə Prezidenti ilə bərabər Prezident İlham Əliyev oldu. Bu, Türkiyə xalqının və Prezidentinin Azərbaycan Prezidentinə olan yüksək ehtiramının göstəricisidir. Bununla yanaşı, ilk avtomobilin həm də Azərbaycan Prezidentinə təqdim edilməsi iki qardaş ölkə arasındakı münasibətlərin xarakterini bir daha ifadə edir”, - deyə Elşad Mirbəşiroğlu vurğulayıb.
Deputatın sözlərinə görə, Türkiyə sənayesinin sürətli inkişafı qeyd etdiyimiz kimi, xarici istehsaldan asılılığı azaldır. Bu da, müvafiq olaraq, ümumilikdə ölkəyə kənar təsirləri məhdudlaşdırır. Türkiyənin gücü, imkanları davamlı olaraq artmaqdadır. Prezident İlham Əliyevin vurğuladığı kimi, bu gün Türkiyənin hərbi gücünü, müdafiə sənayesi sahəsindəki uğurlarını dünyada görürlər və hesablaşırlar.
“Ərdoğanın rəhbərliyi dövründə Türkiyə dünya miqyasında söz sahibinə çevrilib, ölkənin sabitliyi və təhlükəsizliyi etibarlı təmin edilir. Türkiyənin inkişafı, sabitliyi və təhlükəsizliyi bütün türk dünyasının rifahı üçün olduqca vacibdir”, - deyə E.Mirbəşiroğlu diqqətə çatdırıb.