ERMƏNİLƏR BƏŞƏR TARİXİNDƏ MİSLİ GÖRÜNMƏMİŞ SOYQIRIMA İMZA ATMIŞLAR
Qax, 31 mart (AZƏRTAC). Qaxda 31 mart - Azərbaycanlıların soyqırımı günü ilə bağlı yığıncaq keçirilmişdir.
Rayon rəhbərliyi və ictimaiyyət nümayəndələri əvvəlcə ümummilli lider Heydər Əliyevin abidəsi önünə tər çiçəklər düzmüş, Şəhidlər xiyabanında ərazi bütövlüyümüz uğrunda şəhid olmuş igid Vətən övladlarının məzarlarını ziyarət etmişlər.
Rayon icra hakimiyyətinin başçısı Telman Quliyev bildirmişdir ki, erməni millətçiləri tərəfindən xalqımıza qarşı aparılan soyqırımı və təcavüz siyasətinin iki yüz ildən artıq tarixi vardır. Bu mənfur siyasətin başlıca məqsədi azərbaycanlıları qədim ata-baba torpaqlarından sıxışdırıb çıxarmaq, bu ərazilərdə erməni tarixçilərinin və ideoloqlarının uydurduğu “böyük Ermənistan” dövləti yaratmaqdır. Bu məqsədlə mərhələlərlə həyata keçirilən terror və soyqırımının qanlı fəsadları təkcə böyük türk dünyasının deyil, bütün bəşəriyyətin başı üstünü kabus kimi bürümüş, insanlığa qarşı yönəlmiş ən amansız, dəhşətli cinayətlərə rəvac vermiş, əsrlər boyu bu vandalizmin qurbanı olmuş Azərbaycan xalqının şüurunda dərin izlər buraxmışdır. Natiq 31 martın Azərbaycan xalqının tarixinə soyqırımı günü kimi daxil olduğunu bildirmiş, ölkəmiz öz müstəqilliyinə qovuşduqdan sonra bu tarixi gerçəkliyi, xalqımızın məruz qaldığı soyqırımı və etnik təmizləmənin dəhşətli miqyasını beynəlxalq təşkilatlara və dünya ictimaiyyətinə çatdırılması istiqamətində ümummilli liderimiz Heydər Əliyev və Prezident İlham Əliyev tərəfindən məqsədyönlü iş aparıldığını diqqətə çatdırmışdır.
Yığıncaqda icra hakimiyyəti aparatının şöbə müdiri Məhərrəm Məhərrəmovun “31 mart - Azərbaycanlıların soyqırımı günüdür” mövzusunda məruzəsi dinlənilmişdir.
Məruzə və çıxışlarda qeyd olunmuşdur ki, 1918-ci ilin martında erməni millətçiləri Azərbaycanda kütləvi qırğınlar, qətllər törətməklə bəşər tarixində misli görünməmiş soyqırımına imza atmışlar. Azərbaycanlıların kütləvi şəkildə öldürülməsini, repressiyalara məruz qalmasını XX yüzillikdə dünya tarixinin ən qanlı səhifələrindən biri hesab etmək olar. Tədbirdə çıxış edən natiqlər xalqımıza qarşı əsrlər boyu davam edən soyqırımı siyasətinin tarixi kökləri barədə danışmış, soyqırımı hadisələrinə, erməni millətçilərinin qanlı cinayətlərinə hüquqi-siyasi qiymət verilməsində ümummilli liderimiz Heydər Əliyevin tarixi xidmətlərini xüsusi vurğulamışlar.
Bölmənin digər xəbərləri
