ESTONİYADA “AZƏRBAYCANLILAR” ADLI DƏRSLİYİN TƏQDİMATI OLMUŞDUR
Bakı, 23 aprel (AZƏRTAC). Estoniyada çapdan çıxmış “Azərbaycanlılar” kitabının təqdimat mərasimi keçirilmişdir.
Diaspor ilə İş üzrə Dövlət Komitəsinin mətbuat xidmətindən bildirmişlər ki, Estoniyanın Təhsil Nazirliyinin tədris proqramına əsasən tərtib olunmuş kitabı nazirliyin sifarişi və maliyyə dəstəyi ilə Estoniya İnteqrasiya Fondu çap etmişdir. Nazirliyin “Estoniyada yaşayan milli azlıqlarla tanışlıq” layihəsi çərçivəsində hazırlanan kitabın muəllifləri Estoniyadakı Həftəsonu Azərbaycan məktəbinin rəhbəri Sərvinaz Kərimova və müəllim Sənəm Əliyevadır. Estoncaya tərcüməni isə İta Serman etmişdir.
“Aydan” Estoniya-Azərbaycan Mədəniyyət Mərkəzinin sədri Niyazi Hacıyev bildirmişdir ki, “Azərbaycanlılar” kitabı litvalılar və ruslardan sonra Estoniyadakı milli azlıqlar haqqında nəşr olunan üçüncü kitabdır.
Nəşrdə Azərbaycan xalqı, dövlətçilik tarixi, mədəniyyəti, təbiəti, mətbəxi haqqında məlumatlar yer almışdır. Azərbaycan Respublikasını və xalqımızı estonlara tanıtmaq məqsədi daşıyan kitabda milli bayramlar və matəm günləri haqqında da məlumat vardır. Bu nəşrdə Qarabağ münaqişəsi, eləcə də 20 yanvar faciəsi, Xocalı soyqırımı və 31 Mart - Azərbaycanlıların soyqırımı günü barədə məlumata da geniş yer ayrılmışdır. Mövzulara aid rəngli fotoşəkillər kitabı daha maraqlı etmişdir.
Kitabda Estoniyada yaşayan Azərbaycan icması haqqında da ətraflı bilgi verilmişdir. “Azərbaycanlılar” kitabı eston məktəbliləri üçün nəzərdə tutulduğundan daha anlamlı dildə və sadə formada tərtib edilmişdir. 15 000 tirajla nəşr olunmuş kitab artıq kütləvi kitabxanalara və məktəblərə paylanmışdır.
Təqdimat mərasimində çıxış edənlər kitabın bu ölkədə yaşayan azərbaycanlıların eston cəmiyyətinə inteqrasiyasını daha da sürətləndirəcəyini qeyd etmişlər. Kitabın Estoniya və Azərbaycan arasında münasibətlərin inkişaf etdiyi bir zamanda önəmli bir hadisə olduğu vurğulanmışdır.
Estoniya parlamentinin deputatı, həmyerlimiz Eldar Əfəndiyev demişdir ki, biz özümüz də belə bir kitabın nəşrinə vəsait tapa bilərdik. Lakin “Azərbaycanlılar” kitabının Estoniya dövlətinin vəsaiti hesabına ərsəyə gəlməsi və eston məktəblərində istifadə üçün nəzərdə tutulması çox mühüm amildir. Deputatın sözlərinə görə, belə bir dərsliyin çap olunması Estoniyada Azərbaycan haqqında məlumat azlığını aradan qaldıracaq, eston xalqının yeni nəslində ölkəmiz barədə konkret təsəvvür yaradacaqdır. “Bunu Estoniyada yaşayan azərbaycanlılara dövlətin tam dəstəyi kimi qiymətləndirmək lazımdır” deyən Eldar Əfəndiyev əlavə edib ki, hər il “Azərbaycanı tanıyırsınızmı?” layihəsi çərçivəsində məktəblilər arasında müxtəlif müsabiqələr keçirilirdi. Lakin təəssüf ki, yalnız Tallinn məktəbləri ilə məhdudlaşmalı olurduq. Bu kitabın nəşri isə Azərbaycanı bütün Estoniyada məhdudiyyətsiz tanıtmağımıza imkan yaradacaqdır.
Kitabda istifadə olunan materialların toplanmasında “Aydan” Estoniya-Azərbaycan Mədəniyyət Mərkəzinə Azərbaycan Respublikası Diaspor ilə İş üzrə Dövlət Komitəsi kömək göstərmişdir.
Bölmənin digər xəbərləri
