Florida Konqresi kriptovalyuta ehtiyatı yaradılması ilə bağlı qanun layihələrini müzakirədən çıxarıb
Bakı, 7 may, AZƏRTAC
Florida Konqresi ştat səviyyəsində kriptovalyuta ehtiyatı yaradılmasına yönəlmiş iki qanun layihəsini müzakirədən çıxarıb.
AZƏRTAC “Cointelegraph”a istinadla xəbər verir ki, fevral ayında təqdim olunmuş Nümayəndələr Palatasının 487 nömrəli qanun layihəsi bəzi büdcə fondlarının vəsaitlərinin 10 faizədək hissəsinin bitkoinə yatırılmasına imkan verəcəkdi. Eyni ayda təqdim olunan Senatın 550 nömrəli sənədi isə ilk kriptovalyutanın vergilər və rüsumlar üçün ödəniş vasitəsi kimi qəbul edilməsini nəzərdə tuturdu.
Beləliklə, Vayominq, Cənubi Dakota, Şimali Dakota, Pensilvaniya, Montana və Oklahoma ştatları kimi Florida da ştat səviyyəsində kriptosərmayələrə dair qanunvericilik qəbul etmək yarışından geri çəkildi. Bu ştatlarda da oxşar qanun layihələri Nümayəndələr Palatası və ya Senatda təsdiqlənməyib.
Digər tərəfdən, bir neçə gün əvvəl Arizona bitkoin ehtiyatı yaradılmasına bir addım yaxınlaşmışdı. Müvafiq 1025 nömrəli qanun layihəsi yerli Nümayəndələr Palatası tərəfindən qəbul olunmuşdu. Lakin sonradan qubernator Keti Hobs bu sənədə veto qoyUB və rəqəmsal aktivləri “sınaqdan keçməmiş sərmayələr” adlandırıb.
Bu qərar kriptocəmiyyətin tənqidinə səbəb olub. “Satoshi Action Fund” adlı lobbi təşkilatı bildirib ki, Arizona hələ də öz bitkoin ehtiyatına sahib ilk ştat ola bilər.
Hazırda ştat səviyyəsində Nümayəndələr Palatasının 2749 nömrəli qanun layihəsi mövcuddur. Bu sənəd ehtiyatın büdcəyə təsir etməyən şəkildə maliyyələşdirilməsini təklif edir. Senatın 1373 nömrəli sənədi isə ştat xəzinədarına dövlət vəsaitlərinin 10 faizədək hissəsini rəqəmsal aktivlərə yönəltmək səlahiyyəti verəcək. Bu sənədlər hələ yekun səsvermədən keçməyib.
Qeyd edək ki, ötən ay İsveçrə Mərkəzi Bankı likvidlik və dəyişkənlik risklərinə görə, kriptovalyuta ehtiyatı yaradılması ideyasını tənqid edib. Tənzimləyici bildirib ki, ilk kriptovalyuta ölkənin valyuta ehtiyatlarına daxil edilmə meyarlarına cavab vermir.
Bölmənin digər xəbərləri
