SİYASƏT
Fransanın Ermənistanı açıq himayə etməsi sülh danışıqlarına ciddi zərbədir – Siyasi şərhçi
![Fransanın Ermənistanı açıq himayə etməsi sülh danışıqlarına ciddi zərbədir – Siyasi şərhçi](/files/2023/2/1200x630/16865665055112930481_1200x630.jpg)
Bakı, 12 iyun, AZƏRTAC
Ermənistanın baş naziri Nikol Paşinyanın çox qısa müddət bundan əvvəl Rusiyanın, onun liderlik etdiyi hərbi-siyasi ittifaqların ölkəsinin milli təhlükəsizliyinə və suverenliyinə təhdid yaratdığı haqqında açıqlamalarının fonunda Moskvaya səfəri çərçivəsində bu ölkə ilə bağlı söylədiyi fikirlər İrəvanın miskin mahiyyətindən və tarixdən gələn riyakarlığından xəbər verir.
Paşinyanın Laçın yolunun “bağlanması”, Azərbaycanın Qarabağ iqtisadi rayonunda “ermənilərin vəziyyətinin ağır olması” ilə bağlı saxta iddialar səsləndirərək yazıq görkəmi alması isə onun növbəti ikiüzlülüyüdür.
Bu fikirləri AZƏRTAC-a açıqlamasında "İslahatçı Gənclər" İctimai Birliyinin sədri, siyasi şərhçi Fərid Şahbazlı söyləyib.
Siyasi şərhçinin sözlərinə görə, Paşinyanın Qərblə Rusiya arasında vurnuxması sübut edir ki, Ermənistanın regional problemlərin həllində, Azərbaycanla münasibətlərdə aydın və ardıcıl mövqeyi yoxdur. Ermənistan hakimiyyəti bir tərəfdən Qərb dövlətlərindən, Avropa İttifaqından imdad diləyir, digər tərəfdən də Rusiyaya qarşı sanksiyaları “qırmızı xətti” hesab edir. ABŞ-da keçirilən “Demokratiya sammiti”nə dəvət olunan Paşinyan Ukraynanın ərazi bütövlüyünün dəstəkləndiyinə görə bu sammitin yekun sənədinə imza atmağa cəsarət etmir. Bu "riyakar demokrat" Moskvadakı parada qatılır, ardınca Moldovanın paytaxtı Kişineuda “Avropa siyasi birliyi”nin 2-ci Zirvə toplantısında iştirak edir. Moldovadan dərhal sonra isə Soçiyə Putinlə görüşə gedərək Rusiyaya "sədaqəti"ni nümayiş etdirir. Bir tərəfdən özünü və ölkəsini Qərb dövlətlərinə təklif edən Paşinyanın digər tərəfdən Rusiyaya yarınmaq xətti tutması ermənilərin ənənəvi xarakteridir.
“Başqa ölkələrə münasibətdə Rusiyaya "salam" verdiyi üçün ağır sanksiyalar tətbiq edən Qərb dairələri Ermənistanın rəsmi Moskva ilə münasibətlərini, ikibaşlı oyunlarını görməzdən gəlir. Qərbin bu davranışları Azərbaycan cəmiyyətinə yaxşı tanışdır. Özünü demokratiya, insan haqları müdafiəçiləri kimi təqdim edən bu dairələr 30 il ərzində Ermənistanın Azərbaycan torpaqlarını işğal altında saxlamasına, on minlərlə insanın qətlə yetirilməsi faktına susublar. İndi Ermənistana münasibətdə yenə eyni mövqeyi görürük. Bu mənada xüsusilə həmişəki kimi Fransanın fəaliyyəti diqqət çəkir. Fransanın Ermənistanı açıq himayə etməsi, onu silahlandırması sülh danışıqlarına ciddi zərbədir. Rəsmi Parisin bu istiqamətdə mütəmadi qərəzli davranışları Vaşinqtonda gedən sülhyaratma prosesinə qarşı açıq təxribatdır”, - deyə Fərid Şahbazlı vurğulayıb.
O qeyd edib ki, Makronun rəhbərlik etdiyi Fransa özünün qərəzli və təxribatçı fəaliyyəti ilə beynəlxalq münasibətlər sistemində nüfuzunu sürətlə itirir. Artıq heç bir ölkə Fransanın vasitəçiliyini və ya mövqeyini ciddiyə almır. Korrupsiyalaşmış Makron iqtidarı daxili siyasətdəki uğursuzluqlarını indi də xarici siyasətdə yaşamağa başlayıb.