Həyasızlığın “qırmızı xətt”i – ŞƏRH
Bakı, 6 aprel, AZƏRTAC
“İran” adlanan ölkənin Azərbaycan Respublikasına qarşı hücumları səngimək bilmir. Çoxüzlü və riyakar mahiyyəti, fitnəkarlığı, İslamın müqəddəs dəyərlərindən təfriqəçi maraqları üçün yararlanmaq siyasəti, saxta “müsəlman həmrəyliyi” təbliğatı ifşa olunduqca molla rejimi daha da aqressivləşir, öz eyiblərinə kor olub əbasına qapanmaq yerinə çirkab dolu niyyətini başqalarına çamur atmaqla davam etdirir. Hər dəfə İranın ölkəmizə qarşı təxribatından sonra bu kin və şər-böhtan “dəyirmanı”nın, heç olmasa “çax-çaxı”nın dayanacağına, az da olsa ümid bəsləsək də, nəticə hasil olmur.
Bunu AZƏRTAC-a açıqlamasında siyasi ekspert Elçin Mirzəbəyli deyib.
Siyasi ekspert bildirib ki, indi də müsəlman azərbaycanlıları öz evlərindən didərgin salan, yurd-yuvalarını tar-mar edən, torpaqlarını ot bitirməz hala gətirən, ziyarətgahlarını dağıdan, məscidlərində donuz saxlayan, minarələrini azansız qoyan ermənilərlə qol-boyun olan, uşaq qatilləri, müharibə cinayətkarları Robert Köçəryan və Serj Sarkisyana ilan kimi sarılan, Paşinyana pişiklənən rejimin parlamenti xirtdəyədək bulaşdıqları palçığın belə fərqinə varmadan ölkəmizin əleyhinə “bəyanat” qəbul edib.
Müsəlmanların üz qarası olan molla rejiminin deputatları utanıb-qızarmadan, özlərinə xas “bəlağətli” və qıpqırmızı cümlələrlə Azərbaycan Respublikasını İsraildə səfirlik açdığına görə ittiham ediblər. Sən demə biz “məzlum fələstinlilərin haqqına girmişik”. Hələ abır-həya etmədən qərarlarını, qətnamə və bəyanatlarını görməzdən gəldikləri “İslam Əməkdaşlıq Təşkilatına, müsəlman ölkələrinə və azadlıqsevər dünyaya Azərbaycanı qınamaq üçün” müraciət də ünvanlayıblar. Molla rejiminin ermənilərlə bağlı “qırmızı xətt”lərinin çox olduğunu bilirik, amma əgər “İran” adlanan ölkənin leksikonunda həyasızlığın “qırmızı xətt”i deyilən bir anlayış da varsa, o zaman bu “bəyanat” adlanan kağız parçası “qırmızı xətt”i nəinki adlayıb, hətta min kilometrlərlə geridə buraxıb.
“İslam Əməkdaşlıq Təşkilatı Azərbaycan torpaqlarının işğal altında olduğu zaman kəsiyində Ermənistanın təcavüzünü, azərbaycanlılara məxsus dini və mədəni abidələrin dağıdılmasını, ermənilərin vandalizm və etnik təmizləmə siyasətini pisləyəndə, Xocalı soyqırımını tanıyanda və cinayətkarların ədalət məhkəməsi qarşısına çıxarılmalarını tələb edəndə molla rejiminin təmsilçiləri işğalçılarla ortaq mədəniyyətə, dəyərlərə sahib olduqlarını bildirir, Xocalı qatilləri ilə öpüşüb-görüşür, qanlı əllərini ikiəlli sıxır, müsəlman azərbaycanlıların qanına susamış ermənilərə “qardaş” deyirdilər. Azərbaycan torpaqlarının erməni tapdağında olduğu dövrdə bircə dəfə də olsun molla rejiminin parlamentinin müsəlman azərbaycanlıların müdafiəsinə qalxdığının, İslam Əməkdaşlıq Təşkilatına, müsəlman ölkələrinə və bütövlükdə, məlum “bəyanat”da qeyd olunduğu kimi “azadlıqsevər dünyaya” Ermənistanın təcavüzünə son qoyulması ilə bağlı müraciət ünvanladığının şahidi olmadıq. Bu rəzil ultramillətçi rejim Tehranda, Rəştdə qondarma erməni soyqırımına abidələr ucaltdığı, hər il uydurma qətliamın “ildönümü”nün qeyd olunmasına şərait yaratdığı halda Xocalı soyqırımı qurbanlarının xatirəsinin yad edilməsinə belə imkan tanımadı”, - deyə E.Mirzəbəyli qeyd edib.
Siyasi ekspertin sözlərinə görə, Azərbaycan torpaqlarının işğalı dövründə Ermənistan üçün “həyat yolu” olan, işğala və işğalın davam etməsinə hərtərəfli dəstək verən, Azərbaycan Ordusunu Zəfər yürüşünə mane olmağa, yolumuzu kəsməyə çalışan, müsəlman azərbaycanlıların gediş-gəlişinin asanlaşdırılmasına, Azərbaycanın ayrılmaz parçası olan Naxçıvanın blokadadan çıxmasına xidmət edən Zəngəzur dəhlizinin reallaşdırılmasına qarşı çıxan, bu məqsədlə tələm-tələsik Zəngəzurda konsulluq açan İran görəsən hansı haqla “Azərbaycanı qınamaq üçün İslam hökumətlərinə müraciət” ünvanlayır? Hansı ölkələrə ünvanlayır bu müraciəti? Azərbaycan torpaqlarını işğal etdiyinə görə Ermənistanla diplomatik əlaqələrini kəsən Səudiyyə Ərəbistanına? Bəlkə haqq davamızda hər an yanımızda olan Türkiyəyə, Pakistana müraciət edir rejimin parlamenti? Hansı üzlə?
“Maraqlıdır, görəsən öz vətəndaşlarının ən adi hüquqlarını belə tanımayan, işgəncə, edam və zülm üzərində bərqərar olan “İran” adlanan ölkənin deputatları “azadlıqsevər dünya” deyəndə haranı nəzərdə tuturlar? Nə qədər abırsız olmaq lazımdır ki, günahsız insanların ölümünə səbəb olan terror aksiyalarına, edamlara, işgəncələrə, qətliamlara “xeyir-dua” verəsən, insan hüquq və azadlıqlarına qənim kəsiləsən, sonra isə “azadlıqsevər dünya”dan danışasan və hətta müraciət də ünvanlayasan? Bəlkə iranlı deputatların “azadlıqsevərlik” anlayışı terror və işgəncə azadlığıdır? Bəlkə onlar belə bir dünya arzulayırlar və bütün dünyanı viran qoyduqları İranın gününə salmaq üçün uğraşırlar?
Əgər molla rejiminin sözdə “parlament üzvləri” adlanan şər və böhtan püskürdənlər bu qədər cəsarətlidirlərsə, qoy o zaman öz hökumətlərinin üzvlərinə və dini-siyasi rəhbərlərinə müraciət etsinlər və desinlər: “Ay ağaye filankəslər, Ermənistana təzyiq göstərin ki, bu müqəddəs Ramazan günlərində müsəlman azərbaycanlıların İrəvandakı Göy Məscidə getmələrini, Qərbi azərbaycanlıların öz evlərinə qayıtmalarını təmin etsin, indiki Ermənistan ərazisində, tarixi Azərbaycan torpaqlarında müsəlman azərbaycanlılara məxsus dağıdılmış məscidlər, tarixi və mədəni abidələr, ziyarətgahlar bərpa olunsun. Edə bilməzsiniz! O zaman boş-boşuna danışmayın. Onsuz da içiniz bayırdadır və üfunət qoxuyur”, - deyə Elçin Mirzəbəyli vurğulayıb.
Bölmənin digər xəbərləri
