İşğalçı Ermənistanın kapitulyasiyası Ordumuzun gücü hesabına əldə olunmuş nəticədir
Bakı, 6 aprel, AZƏRTAC
Bu gün Azərbaycan Ordusu dünyanın ən güclü Silahlı Qüvvələrindən biri kimi qəbul edilir. Sirr deyil ki, Azərbaycan Xalq Cümhuriyyəti 1920-ci ildə süqut etdikdən sonra ölkəmizdə ordu quruculuğu prosesi dayanmışdı və yalnız Ulu Öndər Heydər Əliyevin 1969-cu ildə hakimiyyətə gəlişindən sonra onun müstəsna xidmətləri sayəsində ölkəmizdə hərbi kadrların hazırlanması prosesi başlanmışdı. Ümummilli Lider Heydər Əliyev 1971-ci ildə Cəmşid Naxçıvanskinin adını daşıyan hərbi liseyin yaradılmasına nail oldu və bu məktəbin fəaliyyəti Azərbaycanda hərb sənətinə marağın güclənməsinə, azərbaycanlı zabit kadrların hazırlanmasına gətirib çıxarmışdı. Heç şübhəsiz ki, Azərbaycan müstəqilliyini bərpa edəndən sonra da Naxçıvanski adına Hərbi Məktəb ordu quruculuğunun əsas bazalarından birinə çevrilmişdi.
Bunu Yeni Azərbaycan Partiyası Nizami rayon təşkilatının sədri Ramil Vəlibəyov AZƏRTAC-a açıqlamasında deyib.
Onun sözlərinə görə, “hər bir müstəqil dövlətin ordusu dövlətin əsas atributlarından biridir” deyən Ümummilli Lider Heydər Əliyevin xalqın təkidli tələbi ilə 1993-cü ildə hakimiyyətə qayıdışından sonra ordu quruculuğu istiqamətində mühüm addımlar atıldı. Ulu Öndər Heydər Əliyevin bu sahədəki siyasi kursunu uğurla davam etdirən Prezident İlham Əliyev tərəfindən də Silahlı Qüvvələrin maddi-texniki təchizatının yenilənməsinə, müasir infrastrukturun yaradılmasına, hərbi qulluqçuların sosial müdafiəsinə, mənzil təminatının yaxşılaşdırılmasına, həmçinin müdafiə sənayesinin inkişaf etdirilməsinə xüsusi diqqət yetirildi. Həyata keçirilən fəaliyyətin nəticəsidir ki, Qafqazın ən müasir ordusu hesab olunan Azərbaycan Silahlı Qüvvələri 44 günlük Vətən müharibəsində düşmən üzərində Qələbə çalaraq tarixi nailiyyətə imza atdı. Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın şanlı Qələbəsinin şahidi oldu və Füzuli, Hadrut, Cəbrayıl, Zəngilan, Qubadlı, Şuşa, Kəlbəcər, Ağdam, Laçın, o cümlədən adıçəkilən rayonların 300-dən çox yaşayış məntəqəsi azad edildi. Təsadüfi deyil ki, işğalçı Ermənistanın kapitulyasiyası Ordumuzun gücü hesabına əldə olunmuş nəticə idi. “Bizim ordumuz güclüdür. Ordumuzun gücü günü-gündən artır. Ölkəmizin gözəl gələcəyi var. Azərbaycan xalqı, Azərbaycan dövləti işğal olunmuş torpaqları mütləq azad edəcəkdir” deyən Ümummilli Lider Heydər Əliyevin vəsiyyətini yerinə yetirən rəşadətli Azərbaycanın Ordusu şanlı parlaq Qələbəni təmin etməklə bir daha döyüş meydanında özünün üstünlüyünü sübut etdi.
“Əldə olunan böyük Qələbə ilə Ermənistanın işğalçılıq siyasətinə son qoyan Azərbaycan Ordusunun gücü beynəlxalq səviyyədə etiraf olundu. Qırx dörd günlük Vətən müharibəsi zamanı Azərbaycan Ordusunda bir nəfər də fərari olmadı, yaralı əsgər və zabitlər isə tezliklə sağalıb, döyüş meydanına qayıdıb, öz missiyasını başa vurmaq üçün can atırdı. Bunun da səbəbi heç şübhəsiz ki, xalq-ordu birliyi idi. Vətən müharibəsi zamanı Azərbaycan xalqı yumruq kimi birləşmişdi və “Dəmir yumruq” isə Azərbaycan xalqının və xalq-ordu birliyin rəmzinə çevrilmişdi. Şübhə yoxdur ki, bu birlik gələcəkdə də bütün vəzifələri icra etmək üçün imkan yaradacaq”, - deyən Ramil Vəlibəyov fikirlərini yekunlaşdırıb.
Bölmənin digər xəbərləri
