“L’intelligent”: Azərbaycan həmişə sülh və əməkdaşlıq naminə balanslı diplomatiyasını inkişaf etdirib
Paris, 1 mart, AZƏRTAC
Kot d’İvuarın fransızdilli “L’intelligent” qəzetində “Afrique & Partage” və Sabahın Afrikası Tədqiqat və Araşdırma Mərkəzinin (CERAD) prezidenti, Atlantik Universitetinin baş direktoru, jurnalist və politoloq Kristian Qambottinin (Christian Gambotti) Azərbaycanın Qoşulmama Hərəkatına (QH) sədrliyindən bəhs edən “Afrika və Qoşulmama Hərəkatı ölkələri” sərlövhəli məqaləsi dərc olunub.
AZƏRTAC xəbər verir ki, məqalədə Hərəkatın tarixi, Bandunq konfransı, təşkilata üzv dövlətlər, Afrika ölkələrinin təşkilatda fəaliyyəti, Azərbaycanın QH-yə sədrliyi dövründə həyata keçirilmiş işlər və onun inkişafına dair təşəbbüsləri, sabah Bakıda işə bağlayacaq Təmas Qrupunun Zirvə görüşü haqqında ətraflı məlumat verilib.
Bildirilib ki, Qoşulmama Hərəkatı 1947-1991-ci illərdə dünyanı idarə edən iki fövqəldövlətin (ABŞ və SSRİ) qarşıdurması - soyuq müharibə dövründə (1961-ci ildə) yaradılmış beynəlxalq təşkilatdır.
Vurğulanıb ki, Azərbaycan Respublikası 2019-cu ildən Qoşulmama Hərəkatına sədrlik etməyə başlayıb və onun mandatı üzv ölkələr tərəfindən 2023-cü ilin sonunadək uzadılıb. Azərbaycanın coğrafi baxımdan müasir geosiyasi, geoiqtisadi və geostrateji maraqların toqquşduğu məkanda yerləşdiyi vurğulanıb. Diqqətə çatdırılıb ki, Cənubi Qafqazda yerləşən, siyasi, etnik, dil və mədəni müxtəliflik diyarı olan Azərbaycan dövlətlər və formalaşmaqda olan yeni bloklar arasında həmişə sülh və iqtisadi əməkdaşlıq naminə balanslı diplomatiyasını inkişaf etdirib. Qoşulmama Hərəkatı çərçivəsində də Azərbaycan dövlətlər arasında həmrəylik siyasəti ilə dəstəklənən balanslı diplomatiyasını beynəlxalq aləmdə təşviq platforması kimi görüb.
Məqalədə, həmçinin vurğulanır ki, martın 2-də Bakı Qoşulmama Hərəkatının növbəti Zirvə görüşünə ev sahibliyi edəcək və bu görüşdə QH-ya üzv ölkələrdə, xüsusilə də dəvət olunmuş Afrika ölkələrində COVID-dən sonrakı iqtisadi bərpa məsələləri müzakirə olunacaq. Münaqişə risklərinin qarşısının alınması və heç bir bloka qoşulmama ruhunun yayılması üçün Azərbaycan bu Zirvə görüşü zamanı Qoşulmama Hərəkatı ölkələrinin Parlament Assambleyasının yaradılmasını təklif edəcək.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
